भारतको हालसम्मका प्रधानमन्त्रीहरुमध्ये वर्तमान प्रधानमन्त्री नरेन्द्र मोदी भारतीय इतिहासमा चौथो सबैभन्दा लामो अवधि सेवा गर्ने प्रधानमन्त्री बनेका छन् । बिहीबार (१३ अगस्ट) देखि जवाहरलाल नेहरू, इन्दिरा गान्धी र मनमोहन सिंहपछिका सबैभन्दा लामो समय देशको सेवा गर्ने प्रधानमन्त्रीको हैसियत मोदीलाई हासिल भएको हो ।
नेहरु, गान्धी र सिंह तीनै जना भारतीय कंग्रेस पार्टीसम्बद्ध भएकाले काङ्ग्रेसइतर दलबाट सबैभन्दा बढी समय भारतको सरकार प्रमुखका हैसियतमा सेवा गर्ने पहिलो राजनेताचाहिँ प्रधानमन्त्री मोदी नै भएका छन् । उनले आफ्नो दल भारतीय जनता पार्टीका नेता तथा पूर्वप्रधानमन्त्री अटलबिहारी वाजपेयीलाई पछाडि पार्दै गैर–काङ्ग्रेस दलबाट सबैभन्दा बढी समयावधि प्रधानमन्त्री बन्ने इतिहास बनाउन सफल भएका हुन् ।
नरेन्द्र मोदीले सन् २०१४ को मे २६ मा भारतीय १४औँ प्रधानमन्त्रीका रूपमा आफ्नो पहिलो कार्यकाल सुरू गरेका थिए । उनको दोस्रो कार्यकाल ३० मे २०१९ मा सुरू भएको हो ।
भारतको इतिहासमा जवाहरलाल नेहरू अहिलेसम्म सबैभन्दा लामो अवधि प्रधानमन्त्री बनेका नेता हुन् । उनको कार्यकाल झण्डै १७ वर्ष रहेको थियो । उनकी छोरी तथा भारतीय पूर्वप्रधानमन्त्री इन्दिरा गान्धीले क्रमशः ११ वर्ष र करिव पाँच वर्ष गरी दुई कार्यकालमा १६ वर्ष पूरा गरेकी थिइन् ।
त्यस्तै काङ्ग्रेस नेता डा।मनमोहन सिंह लगातार दुई पटक पाँच वर्षको सेवा गरी भारतीय इतिहासमा तेस्रो लामो समय प्रधानमन्त्रीका रूपमा सेवा गर्न सफल व्यक्तित्व भएका छन् ।
मोरारजी देसाई (मार्च २४ १९७७ – जुलाई २८, १९७९), चरण सिंह (जुलाई २८,१९७९ – जनवरी १४, १९८०), विश्वनाथ प्रताप सिंह (डिसेम्बर २, १९८९ – नोभेम्बर १, १९९०), चन्द्रशेखर (नोभेम्बर १०, १९९० – जुन २१, १९९१), एचडी देवेगौडा (जुन १, १९९६ – अप्रिल २१, १९९७) र इन्दर कुमार गुजराल (अप्रिल २१, १९९७ – मार्च १९, १९९८) आफ्नो कार्यकाल पूरा नगरेका काङ्ग्रेसइतरका अन्य प्रधानमन्त्रीहरू हुन् ।
नरेन्द्र मोदी भारतको ७४औँ स्वतन्त्रता दिवसको दुई दिन अगाडि सबैभन्दा लामो सेवा गर्ने चौथो प्रधानमन्त्री बन्न पुगेका छन् । यही अगस्ट १५ मा उनले भारतीय प्रधानमन्त्रीका रूपमा स्वतन्त्रता दिवसका अवसरमा लालकिल्ला (रेड फोर्ट) परिसरबाट सातौँ सम्बोधन गर्ने छन् ।
प्रतिक्रिया