नेपाल जनविकास समाजसेवा सङ्घ नामक संस्थाले हरेक वर्ष भदौ १ का दिन भव्यताका साथ मनाउँदै आएको मुलुकी ऐन तथा राष्ट्रिय सामाजिक एकता दिवस यस वर्ष कुनै औपचारिक समारोह आयोजना नगरी मनाइने भएको छ ।

कोरोना भाइरसको महामारीका कारण उत्पन्न असहज परिस्थितिका कारण यस वर्षको ‘५८औँ मुलुकी ऐन तथा राष्ट्रिय सामाजिक एकता दिवस’को औपचारिक कार्यक्रम स्थगित गरिएको उक्त सङ्घका अध्यक्ष सुभद्रा विश्वकर्माले जानकारी दिनुभयो ।

वि.सं. २०२० भदौ १ गतेका दिन तत्कालीक राजा महेन्द्रले नेपालमा छुवाछुत तथा भेदभाव अन्त्य भएको कुरा कानुन बनाएरै घोषणा गरेका थिए । राजा महेन्द्रको उक्त कदमले जातीय विभेद तथा छुवाछुतविरुद्धको जागरणमा ठूलो योगदान पुगेको थियो ।

हाल यससम्बन्धी जति पनि कानुनी तथा व्यवहारिक सुधारका काम भएका छन्, राजनीतिक दलका नेताहरूले जति नै घमण्ड गरे पनि राजा महेन्द्रकै कदमको जगमा टेकेर नै उनीहरूले छुवाछुत र जातीय विभेदविरुद्ध केही गर्न सकेका हुन् भन्ने दाबी गर्नुहुन्छ सुभद्रा विश्वकर्मा ।