विश्व नम्बर एक अष्ट्रेलियन टेनिस खेलाडी एस्ले बर्टीले सन् २०२० को अमेरिकी ओपन (युएस ओपन) बाट आफ्नो नाम फिर्ता लिएकी छिन् । २४ वर्षीय एस्लेले कोरोना भाइरसको महामारीका कारण अमेरिकी ओपनबाट आफ्नो नाम फिर्ता लिएकी हुन् । उनले यो निर्णय बडो मुस्किलले गरेको बताएकी छिन् ।

यतिबेला विश्वमै कोरोना भाइरसको महामारी छ, यस्तो अवस्थामा म कुनै पनि जोखिम उठाउन चाहन्नँ । यात्रा लामो छ, त्यसैले म जोखिमपूर्ण यात्रा गर्न चाहन्न । मनमा सङ्कोच र स्वास्थ्यलाई सङ्कटमा पारेर यात्रा गर्नुको कुनै अर्थ छैन । अर्को कुरा त्यसको प्रत्यक्ष प्रभाव मेरो खेलमा पर्नेछ । मैले सोचेको जस्तो प्रदर्शन गर्न सक्ने छैन । त्यसैले मैले युएस ओपन ग्राण्ड स्लैम नखेल्ने नमिठो निर्णय गरेकी हुँ, एस्लेले भनिन् ।

युएस ओपन विश्वका चार प्रमुख ग्राण्ड स्लैममध्यको एक हो । युएस ओपन ३१ अगस्तदेखि १३ सेप्टेम्बरसम्म अमेरिकाको न्यूयोर्क शहरमा सञ्चालन हुँदैछ । यो प्रत्येक वर्ष यही समयमा आयोजना गरिन्छ । अमेरिका बढ्दै गएको कोरोना महामारीका कारण यो प्रतियोगिताबाट आफ्नो नाम फिर्ता लिन ‘हाई प्रोफाइल’ खेलाडीमा एस्ले पहिलो सूचीमा परेकी छिन् । उनले हालै आयोजक कमिटीलाई इमेल पठाउँदै म र मेरो टिमका साथीहरूले यस्तो फैसला गरेको जानकारी गराएकी थिइन् । एस्लेले इमेलमा आफूहरू वेस्टर्न एण्ड सदर्न र अमेरिकी ओपनका लागि यो वर्ष यात्रा नगर्ने बताएका थिए ।

‘आफूलाई दुवै प्रतियोगितामा खेल्न एकदमै मन थियो तर विषम परिस्थितिले गर्दा त्यो सम्भव भएन’, एस्लेले बताएकी छिन् । उनले आफ्नो मनले मानी–नमानी पनि यस्तो फैसला गर्नु परेको खुलासा गरेकी छिन् । ‘यस्तो फैसला गर्नु ज्यादै मुस्किल थियो तर कोरोनाका कारण जोखिम उठाउने आँट नै गर्न सकिनँ । यस्तो अवस्थामा मैले आफू र आफ्नो टिमलाई जोखिममा पार्न चाहिनँ’, एस्लेले भनिन् ।

व्यवसायिक टेनिसकी ‘राइजिङ स्टार’को रूपमा परिचित एस्लेलेले गत वर्ष फ्रेञ्च ओपन टेनिसको उपाधि जितेर सनसनी फैलाएकी थिइन् । अव एस्लेले आफ्नो उपाधि बचाउन फ्रेञ्च ओपन खेल्छिन् या खेल्दिनन् त्यसको बारेमा पनि अहिलेसम्म कुनै निर्णय गरेकी छैनन् ।