पूर्वमाओवादी केन्द्रका सचिवालय सदस्य जुनेल जिसीको नेतृत्वमा ३१ सदस्यीय नेकपा (माओवादी) पार्टी केन्द्रीय कमिटी निर्माणको घोषणा भएको छ ।

मंगलबार (२० साउन) रफत सञ्चार क्लब भक्तपुरमा पत्रकार सम्मेलनको आयोजना गरी जनयुद्ध र जनभावनाको मुद्दा सत्तारुढ दल नेकपाले बोक्न नसकेको भन्दै नेकपा माओवादी पुनर्गठन भएको घोषणा गरिएको हो ।

प्रचण्डको नेतृत्वमा जनयुद्धदेखि नै नेकपा माओवादी, माओवादी केन्द्र हुँदै नेकपामा आइपुग्दा पनि पार्टी सत्ताको वरिपरि मात्रै घुमेको, देशको समृद्धि, विकास, राजनीतिक निकास नेकपाबाट नहुने आरोप लगाउँदै जिसीले तत्कालीन नेकपा (माओवादी) मा रहेर काम गरेका नेता तथा कार्यकर्ता सङ्गठित भई पुरानो पार्टीलाई ब्युँझाउनु परेको भनाइ राखे ।

पत्रकार सम्मेलनमा नवगठित नेकपा माओवादीका उपाध्यक्ष एवं प्रवक्ता डेनिस सिंहले आर्थिक सामाजिक रुपान्तरण र सर्वहारा वर्गको मागलाई नेकपाले उपेक्षा गरेपछि आफूहरुले नेकपा (माओवादी) घोषणा गर्न बाध्य भएको बताए ।

यसरी नेकपा (माओवादी) गठन गरिनुलाई केही समयअघि नेकपा एमाले नामको दल दर्ता गरिएको सन्दर्भसँग जोडेर हेरिएको छ । केपी ओलीको इशारामा एमाले दर्ता गरिएको आरोप प्रचण्ड पक्षले लगाएको थियो । कतै माओवादी दल पनि प्रचण्डको इशारामा घोषणा गरिएको त होइन भन्ने चासो पैदा भएको छ ।