प्रधानमन्त्री केपी शर्मा ओलीसँग सहमति जुटाउन बैठक तय भएर पनि प्रचण्ड अनुपस्थित भएपछि स्थायी समितिको मंगलबार (साउन १३ गते)को लागि निर्धारित बैठक अनिश्चित कालका निम्ति स्थगित गरिएको छ । गत माघ १९ गते भएको पार्टी केन्द्रीय समितिको बैठकले २०७७ सालको चैत २५ देखि ३० गतेसम्म पार्टीको महाधिवेशन गर्ने निर्णय गरेको थियो ।
केही समयअघि सम्पन्न सचिवालय बैठकले आगामी महाधिवेशनसम्बन्धी विषयको विस्तृत प्रतिवेदन तयार गर्न प्रधानमन्त्री एवम् पार्टी अध्यक्ष केपी शर्मा ओली र कार्यकारी अध्यक्ष प्रचण्डलाई जिम्मेवारी दिएको थियो । दुई नेता भेट हुनेवित्तिकै प्रचण्डले दुईमध्ये एक पद छोड्न केपीमाथि दबाब दिने गर्नुभएको थियो भने केपी महाधिवेशनमा केन्द्रित भएर संवाद अघि बढाउन चाहनुहुन्थ्यो । गत साताको मंगलबार प्रधानमन्त्रीले अलिक कडा र स्पष्ट जवाफ दिनुभएपछि प्रचण्डसँग संवाद हुन सकेको थिएन ।
यसैबीच महासचिव विष्णु पौडेलले दुई नेताबीचको संवादलाई निरन्तरता दिन पहल गर्नुभएको र यस क्रममा साउन १२ गते सोमबार बैठक तय भएको थियो । तर घाँटी दुःखेको बहाना गरेर प्रचण्ड पूर्वनिर्धारित बैठकमा उपस्थित हुनुभएन । त्यसपछि महासचिव पौडेलले मंगलबार (साउन १३ गते बिहान ९ बजेको लागि दुई नेताबीच आफूसमेत बसेर बैठक बस्ने व्यवस्था प्रचण्डसँग सल्लाह गरेर नै गर्नुभएको थियो । तर प्रचण्ड मंगलबार पनि बालुवाटार जानुभएन । पौडेलले नौ बजेदेखि साढे दश बजेसम्म टेलिफोन गर्दा पनि प्रचण्डले फोनसमेत उठाउनु भएन ।
बैठकका एजेण्डाहरूमा दुई नेताबीच छलफल नै नहुने भएपछि महासचिवले विधानमा रहेको आफ्नो अधिकार प्रयोग गरी स्थायी समितिको चालु बैठक स्थगित गरिदिनुभएको हो । अब स्थायी समितिको बैठक कहिले हुने भन्ने निश्चित गरिएको छैन । बैठक स्थगित भएको सूचना महासचिवद्वारा जारी भएपछि प्रचण्ड र झलनाथ खनाल दिउँसो साढे एक बजे प्रधानमन्त्रीसँग भेट गर्न बालुवाटार पुग्नुभएको थियो ।
उहाँहरूले बैठक स्थगित गर्न नहुने बताउँदै बैठक बस्न आफूहरू आएको जानकारी प्रधानमन्त्रीलाई गराउनुभएको थियो । महासचिवद्वारा विधिवत स्थगित गरिएकोले अहिले बैठक बस्न नसकिने जवाफ प्रधानमन्त्रीले दिनुभएपछि पनि प्रचण्ड र खनालले आफूहरू बैठक बस्ने जिद्दी गर्नुभएको थियो । त्यसपछि प्रधानमन्त्री ओलीले ‘तपाईंहरू मात्र बसेर बैठक हुन्न, त्यस्तो बैठकले कानूनी मान्यता पाउन पनि सक्दैन’ भन्ने जवाफ दिनुभएको थियो । प्रधानमन्त्रीको यस्तो जवाफ सुनेर प्रचण्ड र खनाल क्रुद्ध हुँदै बालुवाटारबाट बाहिरिनुभएको थियो ।
बैठक स्थगित भएपछि बामदेव गौतमले एकताको लागि भन्दै ६ बुँदे प्रस्ताव सार्वजनिक गर्नुभएको छ ।
पार्टी विग्रह तत्काल रोक्नका लागि दुवै अध्यक्षसमक्ष राखेको प्रस्ताव
१. कमरेड केपी शर्मा ओली एकता महाधिवेशनसम्म अध्यक्ष र प्रतिनिधिसभाको यस कार्यकालको बाँकी अवधिभर प्रधानमन्त्रीको जिम्मेवारीमा रहने ।
२. कमरेड पुष्पकमल दाहाल ‘प्रचण्ड’ एकता महाधिवेशनसम्म सम्पूर्ण कार्यकारी अधिकारसहित अध्यक्षको जिम्मेवारीमा रहने ।
३. पार्टीको एकता महाधिवेशन सहमतिमा आयोजना गर्ने ।
४. प्रधानमन्त्रीका दैनन्दिनका कामहरूमा पार्टीले हस्तक्षेप नगर्ने । तर सरकारले राष्ट्रिय तथा अन्तर्राष्ट्रिय महत्वका विषयहरूमा निर्णय गर्नुपूर्व पार्टीको सचिवालयमा परामर्श गर्ने । प्रशासन तथा सक्षा निकायका कर्मचारीहरूको पदोन्नती र सरुवाका लागि मापदण्ड निश्चित गरी कार्यान्वयन गर्ने ।
५. पार्टी केन्द्रीय सचिवालयको सुझाव र परामर्शमा मन्त्रीपरिषद् पुनर्गठन तथा राजनीतिक तथा संवैधानिक नियुक्ति गर्ने । संसदमा नीति तथा कार्यक्रम र बजेट प्रस्तुत गर्नुपूर्व सचिवालयको परामर्श लिने ।
६. अवदेखि पार्टीका बैठकहरू पार्टी कार्यालयमा आयोजना गर्ने ।
१३ साउन, २०७७
वामदेव गौतम
उपाध्यक्ष
नेपाल कम्युनिष्ट पार्टी (नेकपा)
प्रतिक्रिया