ललितपुर महानगरपालिका वडा नं २७ सुनाकोठी बस्ने स्थायी ठेगाना सुनसरी घर भएकी २३ वर्षीया महिलामा कोरोना सङ्क्रमण पुष्टि भएको छ । उनी यही जेठ ११ गते ग्वार्काेस्थित किष्ट मेडिकल कलेजमा सुत्केरी हुन भर्ना भएकी थिइन् ।
जेठ १२ गते उनको शल्यक्रिया गर्नुपूर्व स्वाब सङ्कलन गरी राष्ट्रिय जनस्वास्थ्य प्रयोगशाला टेकु पठाउँदा शनिबार (१७ जेठ) पोजेटिभ देखिएको हो । महिला यही जेठ १५ गते अस्पतालबाट डिस्चार्ज भएको जिल्ला जनस्वास्थ्य कार्यालयका प्रमुख खगेश्वर गेलालले बताए ।
गेलालका अनुसार हालसम्म महिलाको स्वास्थ्य अवस्था सामान्य नै छ । उनी सुनाकोठीमै बसिरहेका कारण उनको घरमा भएका अन्य पाँच जनालाई मास्कलगायत सामग्री दिएर क्वान्टिनमा बस्न अनुरोध गरिएको छ । पाँच दिनपछि परिवारका सबैको कोरोना परीक्षण गरिने गेलालले बताए ।
किष्ट अस्पतालमा महिलाको उपचारमा संलग्न चिकित्सकलाई पनि अस्पताल वा सेल्फ क्वारेन्टाइनमा बस्न आग्रह गरेको गेलालको भनाइ छ । सुत्केरी गर्न राखेको कक्षमा चारदेखि पाँच घण्टा बन्द गरी सङ्क्रमण हटाउने र औषधि छर्किएर पुनःसञ्चालन गरिने बताइएको छ ।
ज्ञातव्य छ, किष्ट अस्पतालमा गत बुधबार मात्र वडा नं २२ बुङ्मतीका ५७ वर्षीया पुरुषको कोरोना सङ्क्रमणबाट मृत्यु भएको थियो ।
प्रतिक्रिया