प्रतिबन्धित नेपाल कम्युनिष्ट पार्टीका केन्द्रीय तहका एक नेता लेखराज गजमेरलाई बुधबार (१४ जेठ) साँझ काभ्रे (धुलिखेल)बाट गिरफ्तार गरिएको छ । विप्लव नेतृत्वको नेकपाअन्तर्गत दलित मुक्ति मोर्चाका केन्द्रीय सदस्य गजमेरलाई जिल्ला प्रहरी कार्यालय धुलिखेलले थुनामुक्त गरेलगत्तै सादा पोशाकका प्रहरीले पुनः गिरफ्तार गरेका हुन् ।

गजमेरलाई पुनः गिरफ्तार गरी प्रहरीले काठमाडौं ल्याएका बताइएको छ । सङ्गठित अपराधअन्तर्गत विस्फोटक पदार्थ मुद्दामा केही महिनाअघि पक्राउ परेका गजमेरलाई बुधबार सर्वोच्च अदालतको आदेशमा थुनामुक्त गरिएको थियो । सर्वोच्चको आदेशानुसार जिल्ला अदालत काभ्रेपलाञ्चोकका श्रेस्तेदार गोविन्दप्रसाद घिमिरे र अधिकारकर्मी हिरामान लामाको रोहवरमा गजमेरलाई थुनामुक्त गरिए पनि लगत्तै पक्राउ गरिएको हो ।

बताइएअनुसार गजमेरलाई धुलिखेल प्रहरीले थुनामुक्त गरेलगत्तै प्रहरी निरीक्षक सुरेश खत्री नेतृत्वको सादा पोशाकका प्रहरी टोलीले जिल्ला प्रहरी कार्यालय काभ्रे (धुलिखेल)को अघिल्तिरबाट गिरफ्तार गरिएको हो । उनलाई गत वैशाख १८ गते जिल्ला प्रहरी कार्यालय रामेछापको हिरासतबाट काभ्रेपलाञ्चोक ल्याइएको थियो । केही महिनाअघि सिन्धुपाल्चोकबाट गिरफ्तारीमा परेका गजमेरलाई सङ्गठित अपराधअन्तर्गत विस्फोटक पदार्थ मुद्दामा दोलखा, रामेछापपछि काभ्रेपलाञ्चोकमा मुद्दा चलाइएको थियो ।

गजमेरले यही जेठ २ गते सर्वोच्च अदालतमा बन्दी प्रत्यक्षीकरणको निवेदन दिएपछि सर्वोच्चले थुनामुक्त गर्न आदेश दिएको थियो ।