गत सोमबार (८ वैशाख) क्याबिनेटबाट पारित गरी राष्ट्रपतिबाट स्वीकृत समेत भइसकेको अध्यादेश चरम विवादमा परेपछि सरकारले उक्त अध्यादेश खारेज गरेको सन्दर्भ यतिबेला चर्चाको चुलिमा छ ।संवैधानिक परिषद् र राजनीतिक दलसम्बन्धी दुई अध्यादेश खारेजीलगत्तै प्रधानमन्त्रीद्वारा प्रमुख विपक्षी दलका नेपाली काङ्ग्रेसका सभापति शेरबहादुर देउवालाई बालुवाटार बोलाएर छलफल गरिएको सन्दर्भ पनि चासो र चर्चाको विषय बनेको छ ।
त्यसो त, सभापति देउवासँगै नेकपाका कार्यकारी अध्यक्ष प्रचण्डलाई पनि प्रधानमन्त्री ओलीले छलफलमा सहभागी गराएका थिए । आखिर विपक्षी दलका सभापतिलाई बोलाएर प्रधानमन्त्रीले के कुराकानी गरे होलान् भन्ने जिज्ञासा सबैमा उठ्नु स्वाभाविक नै छ ।
राजनीतिक बजारमा अनेक अडकलबाजी लगाइए पनि सभापति देउवा र प्रधानमन्त्री ओलीबीचको छलफलमा त्यस्तो कुनै ‘खास’ नीति–रणनीतिका कुरा नभई औपचारिक प्रकारको कुराकानीमै सीमित भएको बुझिएको छ ।
प्रधानमन्त्रीसँगको भेटको आरम्भमा सभापति देउवाले सरकारले दुवै अध्यादेश फिर्ता लिएकामा प्रधानमन्त्रीलाई धन्यवाद दिएका थिए । यो प्रकरण चर्किएर जाने अवस्था थियो भन्दै सभापति देउवाले बेलैमा फिर्ता लिएर सुझबुझ देखाएको भनी प्रधानमन्त्री ओलीको प्रशंसा गरेका थिए ।
त्यसपछि अलिक गम्भीर हुँदै देउवा सांसद डा. सुरेन्द्र यादवलाई अपहरण शैलीमा काठमाडौं ल्याइएको घटनातर्फ केन्द्रित भए । वर्तमान अवस्थामा यस्तो गर्नु अति नसुहाउँदो कार्य भनी सो प्रकरणको उनले खुलेर आलोचना गरे । यतिमा मात्र अडिएनन् देउवा, उक्त घटनामा संलग्नलाई कारवाहीको लागि प्रधानमन्त्रीसँग उनले जोडदार माग गरे । यस कुरालाई काङ्ग्रेस पार्टी कार्यालयका मुख्यसचिव कृष्णप्रसाद पौडेलले पनि पुष्टि गरेका छन् ।
उक्त घटनाका दोषीलाई कारवाही गर्नुपर्ने माग देशभरी उठेको र आफ्नो माग पनि यही रहेको प्रष्ट्याउँदै सभापति देउवाले देशमा कानूनी राज्य छ भने निष्पक्ष अनुसन्धान र कारवाही हुनुपर्छ होइन भने हेर्दै जाने र परिस्थितिका आधारमा निर्णय लिने ‘चेतावनी’ दिएका थिए ।
यस्तै, कोरोना भाइरसको सङ्क्रमण रोक्न व्यापक परीक्षण अहिलेको आवश्यकता भएको र समुदायस्तरमा व्यापक परीक्षण गर्न ढिलो नगरौँ भनेर प्रधानमन्त्रीसमक्ष आग्रह गर्दै सभापति देउवाले स्वास्थकर्मीलाई पिपिईलगायतका आवश्यक सामग्री यथाशिघ्र पुऱ्याउन सुझाव पनि दिएका थिए । स्वास्थकर्मीलाई हतोत्साहित गर्न खोज्ने कुनै पनि कार्य तुरुन्तै रोक्नुपर्ने उनको धारणा थियो ।
छलफलको विषयवस्तु यसरी मोडिएपछि सभापति देउवाले श्रमिकलाई कि खान दिनोस् कि गाउँ जान दिनोस् भन्दै राहत घोषणा अधुरो भएको, पुग्नुपर्नेकोमा अझै नपुगेको, श्रमिक, बेरोजगार, विद्यार्थी र साना ठूला सबै व्यवसायीका लागि तत्काल अर्को राहत प्याकेज ल्याउन आग्रह गरे । प्रधानमन्त्रीले मुसुमुसु हाँस्दै देउवाका सुझाव ध्यान लगाएर सुनेका बताइन्छ ।
यस्तै, विदेशमा रहेका नेपालीले देशलाई रेमिट्यान्स पठाएर योगदान गरिरहेको उल्लेख गर्दै सभापति देउवाले आज उनीहरू अप्ठ्यारो परेको स्थितिमा उद्धार गर्ने बारे तत्काल योजना सार्वजनिक गरी कार्यान्वयन गर्नुपर्ने सुझाव दिएका थिए ।
अन्त्यमा उनले कोरोनाको जोखिमसँग लडिरहँदा सरकारले अब विवाद्का कुनै कुरा नल्याओस् भनी सजग गराएर बालुवाटारबाट बिदा भएका थिए ।
pict: Rss
प्रतिक्रिया