१३औँ सागमा पदकविजेता खेलाडीको पुरस्कार बैंक खातामा

१३औँ सागमा पदकविजेता खेलाडीको पुरस्कार बैंक खातामा


केही समयअघि काठमाडौंमा सम्पन्न १३औं दक्षिण एसियाली खेलकुद (साग)का पदकविजेता खेलाडीको पूर्वघोषित नगद पुरस्कार सम्बन्धित खेलाडीहरूको बैंक खातामा पठाइएको छ ।

पदकविजेता ४ सय ३५ खेलाडीका लागि १९ करोड ५३ लाख रुपैयाँ उनीहरूको खातामा पठाइएको हो । त्यसमध्ये ९२ पदकविजेताको ३ करोड ६३ लाख तथा ८७ खेलाडीको ४ करोड ८२ लाख रुपैयाँ गत चैत मसान्तमै खेलाडीको खातामा पठाइएको थियो ।

बाँकी खेलाडीका पुरस्कार रकम बुधबार (३ वैशाख) खातामा पठाइएको बताउँदै प्रशिक्षक र संघको पुरस्कार क्रमैसँग पठाइने राष्ट्रिय खेलकुद परिषदले जानकारी गराएको छ ।

१३औं सागमा नेपालले ५१ स्वर्ण, ६० रजत र ९६ कांस्य गरी कुल २०७ पदक जितेको थियो । १३औं सागको उपलब्धि नेपालले दक्षिण एसियाली खेलकुदमा हासिल गरेको अहिलेसम्मकै ठूलो उपलब्धि हो ।

व्यक्तिगत स्पर्धामा स्वर्ण जित्नेलाई ९ लाख, रजतलाई ६ लाख र कांस्यलाई ३ लाख तथा टिममा स्वर्णलाई ६ लाख, रजतलाई ४ लाख र कांस्यलाई २ लाखका दरले पुरस्कार पठाइएको छ । पुरस्कार रकममा कर कट्टा गरिएको छैन ।