कोरोना भाइरस (कोभिड १९) का कारण यात्रु संख्यामा कमी आएपछि नेपाल वायुसेवा निगमले आफ्नो उडान तालिकामा केही कटौती गरेको छ ।
निगमको कटौती तालिकाअनुसार दैनिक दुईवटा उडान गर्दै आएको काठमाडौं–दिल्ली–काठमाडौं उडान मार्च १५ देखि लागु हुने गरी एउटा मात्र गरिने छ भने अब बिहानको उडान नियमित राखी साँझको विमान अर्को व्यवस्था नभएसम्मका लागि स्थगित गरिएको छ ।
यस्तै बैंगलौरको नियमित उडान मार्च १९ र ३१ तारिखका लागि रद्द गरिएको छ भने मुम्बईका लागि हुने प्रत्येक शुक्रबारको उडान १५ मार्च देखि १५ अप्रिल सम्म स्थगित गरिएको छ ।
बैंककको मार्च ११ र मार्च २५ को उडान एवं हङकङको मार्च १९ र मार्च २६ को उडान पनि रद्द गरिएको छ । काठमाडौं–दोहाबीचको उडान फागुन २७ गते देखिनै अर्को सूचना नभएसम्मका लागि स्थगित गरिसकिएको निगमले जनाएको छ ।
उपरोक्त उडानका टिकट खरीद गरेका यात्रुहरुलाई टिकट फिर्ता गर्दा भुक्तानी गरेको रकम पुरै उपलब्ध गराइने र टिकटको उडानको मिति एक पटक परिवर्तन गर्न शुल्क नलाग्ने व्यवस्था गरिएको पनि जानकारी दिइएको छ ।
प्रतिक्रिया