सरकारले ज्ञानमा नभई पुस्तकको व्यापारमा कर लगाइएको स्पष्ट पारेको छ । पछिल्ला दिनमा पुस्तकमा कर लगाइएको भन्दै सरकारको आलोचना गर्दै विभिन्न खालका प्रदर्शन भइरहेको सन्दर्भमा सरकारले ज्ञानमा नभई व्यापारमा कानूनअनुसार कर लगाइएको बताएको हो ।

सञ्चार तथा सूचना प्रविधि मन्त्रालयमा बिहीबार आयोजित नियमित पत्रकार सम्मेलनमा सो मन्त्रालयको समेत जिम्मेवारी सम्हालेका अर्थमन्त्री डा. युवराज खतिवडाले भने, ‘पुस्तकको व्यापार पनि व्यापार हो, ज्ञान व्यापार होइन, पुस्तक बेचेर कमाएको नाफामा कर लाग्छ, यसमा दिग्भ्रमित नहुनुहोस् ।’

उनले ठूलो लगानीमा देशभित्र छापाखाना स्थापना भएको, कागजमा उनीहरूले कर तिरेको, सामान आयात गर्दा कर लागेको प्रसंग जोड्दै स्वदेशी उद्योगको संरक्षण गर्ने लक्ष्यका साथ सरकार लागिपरेको बताए । उनले पुस्तकको बिक्रीमा धेरै मुलुकले कर लगाएको प्रसंग जोड्दै भने, ‘कतिपय मुलुकले १८ प्रतिशतसम्म कर लगाएका छन् । धेरै मुलुकले त पाँचदेखि १० प्रतिशतसम्म कर लगाएका छन् । हाम्रो ध्येय स्वदेशी उद्योगको संरक्षण गर्नेतर्फ नै छ ।’

देशभित्रै अर्बौंलगानीमा प्रेस स्थापना भएको र उनीहरूले बैंकबाट ऋण लिएको तथ्य पेस गर्दै मन्त्री डा. खतिवडाले स्वदेशी उद्योगको संरक्षण गर्नु सरकारको दायित्वसमेत भएको स्पष्ट पार्नुभयो ।
मन्त्री खतिवडाले भने, ‘कुनै छापाखानाले छापेर बिक्री गर्ने पुस्तकमा कर तिर्नुपर्छ, कागज आयात गर्दा १५ प्रतिशत कर तिर्नुपर्छ । ती छापाखाना कर नै नतिरी ल्याउने पुस्तकसँग कसरी प्रतिस्पर्धा गर्न सक्छन् र टिक्न सक्छन् ?’

तयारी पुस्तक ल्याउँदा आयातकर्ताले के कति परिमाणमा आयात गरे भन्नेबारेमा समेत स्पष्ट तथ्यांक नरहेको पाइएको उनको भनाइ छ । राजस्व लाग्ने विषय होइन भनेर ‘अन्डरमाइन’ गरिएको मन्त्री खतिवडाले उल्लेख गरे । एउटा पुस्तकबाट ३० देखि ४० प्रतिशत कमिसन लिन मिल्ने तर १० प्रतिशत कर तिर्दा किन समस्या भन्दै मन्त्री खतिवडाले प्रश्न गरे । पुस्तकको करको विषयमा आफू खुला बहस गर्न तयार रहेको भन्दै मन्त्री खतिवडाले संघीय संसदमा समेत आफूले सो बारेमा प्रस्ट पारेको र अझै प्रस्ट पार्ने बताए ।

कर नतिरी आयात भएका पुस्तक पक्राउ गर्दा ज्ञान पक्राउ गरियो भन्न नमिल्ने उल्लेख गर्दै उनले चोरी गरिएको सामान पक्राउ गरिने उल्लेख गरे । उनले पुस्तकमा कर किन लगाइएको भन्नेबारेमा आफू सबै पक्षसँग छलफल गर्न तयार रहेकोसमेत जनाउ दिए ।
रासस