जलस्रोत तथा सिँचाइ विकास डिभिजन कार्यालय बैतडीका निमित्त डिभिजन प्रमुख सुरेशराज भट्ट एक लाख घुससहित पक्राउ परेका छन् । भट्टलाई अख्तियार दुरुपयोग अनुसन्धान आयोग महेन्द्रनगरका प्रहरी निरीक्षक विनोद श्रेष्ठको टोलीले बुधबार बिहान पक्राउ गरेको हो ।

भट्टलाई चमेलीया नदी नियन्त्रण तथा तटबन्धन आयोजनाको उपभोक्ता समितिका पदाधिकारीबाट घुस लिँदै गरेको अवस्थामा बुधबार बिहान नौ बजे पक्राउ गरिएको हो । पक्राउ परेका भट्टलाई आज महेन्द्रनगरमै राखिने र भोलि अख्तियार दुरुपयोग अनुसन्धान आयोग टंगाल पठाइने तयारी भइरहेको छ ।

भट्टले उक्त उपभोक्ता समितिसँग दुई लाख रुपैयाँ मागेको र अहिले एक लाख लिएको बताइएको छ ।