कोरोना भाइरसबाट चीनमा नौको मृत्यु, ४४० पीडित

चिनियाँ स्वास्थ्य अधिकारीहरूले बुधबार नयाँ कोरोना भाइरस (२०१९–कोभ) का कारण सिर्जित निमोनियाबाट चार सय ४० जना पीडित भएको घोषणा गरेका छन् । यस नयाँ भाइरसका कारण हालसम्म नौजनाको मृत्यु भइसकेको छ र मृत्यु हुने सबै मध्यचीनको हुबेई प्रान्तका रहेका राष्ट्रिय स्वास्थ्य आयोगका उपनिर्देशक ली बिनले बताए । यो भाइरस मंगलबारसम्म चीनका १३ वटा प्रान्तमा देखिएको छ ।



पत्रकार सम्मेलनमा उपनिर्देशक लीले मंगलबार मात्र १४९ जनामा भाइरस देखिएको पुष्टि भएको जानकारी दिए । विदेशमा हालसम्म जापानमा एउटा घटना प्रमाणित भएको छ भने थाइल्याण्डमा तीन र दक्षिण कोरियामा एकजनामा यो भाइरसको संक्रमण देखिएको छ ।

चिनियाँ अधिकारीहरूले कुल २,१९७ को विशेष निगरानी गरिएको र तीमध्ये एक हजार ३९४ जनाको स्वास्थ्य परीक्षण गरिएको जनाएका छन् । स्वास्थ्य जाँच गरिएकामध्ये ७६५ जनालाई डिस्चार्ज गरिएको छ ।

उपनिर्देशक लीले यस भाइरसबाट संक्रमणको घटना निकै बढेको देखिएको बताए । उनले नयाँ भाइरसको परीक्षण विधि प्रयोगमा आएपछि रोगी व्यक्तिहरूको संख्या देखिएको हुन सक्ने बताए । विज्ञहरूका अनुसार श्वासप्रश्वासबाट यो भाइरस अर्को व्यक्तिमा संक्रमण हुने गर्छ ।
रासस–सिन्ह्वा

प्रतिक्रिया