पूर्वइन्टरपोल प्रमुख मङलाई चीनमा १३ वर्ष जेल सजाय

पूर्वइन्टरपोल प्रमुख मङलाई चीनमा १३ वर्ष जेल सजाय


घुस लिएको आरोप लागेका इन्टरपोलका पूर्वप्रमुख मङ खोङवेलाई चीनको एक अदालतले १३ वर्ष जेल सजाय सुनाएको छ ।

सन् २०१८ मा अन्तर्राष्ट्रिय प्रहरी सञ्जाल (इन्टरपोल) को प्रमुख रहेकै समय फ्रान्सबाट चीन गएका समय उनी परिवारको सम्पर्कमा नपुगेको भन्दै पारिवारिक स्रोतबाट दाबी गरिएपछि उनको अवस्थाबारे सर्वत्र चासो व्यक्त गरिएको थियो । तर पछि चीन सरकारले भ्रष्टाचारविरुद्धको राष्ट्रपति सी जिन्पिङको अभियानअन्तर्गत उनलाई पक्राउ गरिएको पुष्टि गरेको थियो ।

चीनको सार्वजनिक सुरक्षा उपमन्त्रीका रूपमा जिम्मेवारी सम्हालेका पूर्वइन्टरपोल प्रमुख मङले २० लाख अमेरिकी डलरभन्दा बढी घुस लिएको अदालतसमक्ष स्वीकार गरेका चीनले बताएको छ । मङले व्यक्तिगत फाइदाका लागि पदको दुरुपयोग र परिवारको ‘निकै खर्चालु जीवनशैली’का लागि राज्यकोषको अनुचित प्रयोग र कम्युनिस्ट पार्टीका सिद्धान्तलाई बेवास्ता गरेको आरोप लगाइएको थियो ।

‘मङलाई पदीय मर्यादा विपरीत घुस लिएको आरोपमा अदालतले १३ वर्ष ६ महिना जेल सजायका साथै दुई लाख ९० हजार अमेरिकी डलर बराबरको जरिवाना तोकेको छ,’ तियानजिन एक नम्बर जनअदालतको फैसला उद्धृत गर्दै एएफपीले जनाएको छ । सुनुवाईका क्रममा गत जुनमा २१ लाख अमेरिकी डलर घुस लिएको उनले स्वीकार गरेका थिए । अदालतले यसलाई पदीय मर्यादाको दुरूपयोग गर्दै ‘गैरकानूनी लाभ खोजेको’ वा घुस लिएको ठहर गरेको छ ।

मङले उनमाथि लागेका सम्पूर्ण अपराधलाई स्वीकार गरेका र यसमा उनले पुनरावेदन पनि नगर्ने अदालतले एक विज्ञप्ति जारी गर्दै जनाएको छ ।