गायिका आस्था राउतविरुद्ध प्रहरीले आइतबार जिल्ला प्रशासन कार्यालय काठमाडौंमा पक्राउ पुर्जी जारी गर्न माग गर्दै निवेदन दर्ता गरेको छ । प्रहरीले राउतविरुद्ध अभद्र व्यवहारमा मुद्दा दर्ता गराएको हो । मुद्दा दर्तालगत्तै प्रहरीले राउतलाई पक्राउ गर्ने तयारी गरेको छ ।

त्रिभुवन विमानस्थलबाट भद्रपुर जाने क्रममा सुरक्षा चेकजाँच गर्ने महिला प्रहरीसँग आस्थाको विवाद परेको थियो । राउतले चेकजाँचको क्रममा भएको विवाद फेसबुक लाइभ गर्दै प्रहरीलाई गाली गरेपछि सो विवाद सार्वजनिक भएको थियोे । त्यसपछि विमानस्थलको सुरक्षा जाँचको भिडियोसमेत सार्वजनिक भएको थियो ।

गायिका राउत भने कार्यक्रमका लागि अहिले भारतको सिक्किम पुगेकी छिन् । उनी आजै नेपाल फर्कने कार्यक्रम रहेको छ ।

अन्तर्राष्ट्रिय विमानस्थल सुरक्षा कार्यालयमा कार्यरत प्रहरी जवान रमिता श्रेष्ठले बिहीबार गायिका राउतले सुरक्षा जाँचका क्रममा आफूमाथि अभद्र्र व्यवहार गरेको भन्दै शुक्रबार विमानस्थल सुरक्षा कार्यालयमा उजुरी दिएकी थिइन् ।

अभद्र व्यवहारमा २५ दिनसम्म थुनामा राखेर प्रहरीले अनुसन्धान गर्न पाउने व्यवस्था रहेको छ । अनुसन्धानमा यदि दोषी ठहर भए एक वर्ष जेल सजाय र १० हजार जरिवाना वा दुवै सजाय हुने कानुनी व्यवस्था छ ।