महोत्तरी जिल्लाको सोनमा गाउँपालिकामा शुक्रबारदेखि १० दिने बृहत् निःशुल्क स्वास्थ्य शिविर शुरु भएको छ । सोनमा गाउँपालिका–३ स्थित खखना माविको प्रांगणमा नेपाली सेनाद्वारा सञ्चालित बृहत् निःशुल्क स्वास्थ्य शिविर आउँदो पुस ५ गतेसम्म सञ्चालनमा रहने स्वास्थ्य शिविरका संयोजक पूर्वस्वास्थ्य तथा जनसंख्या राज्यमन्त्री डा. सुरेन्द्र यादवले बताए ।

शिविरमा नेपाल आर्मी हस्पिटलका विशेषज्ञ डाक्टरहरू १८० जना सर्जनसहितको टोली, ११० जना अन्य स्वास्थ्यकर्मी तथा अन्य विभिन्न स्वास्थ्यकर्मीको टोली सहभागी रहेको छ । शिविरमा पेट तथा छाती रोग, मुटु रोग, स्त्री तथा प्रसूति रोग, बाल रोग, छाला तथा यौन रोग, नसा तथा हार्डजोर्नी रोग, नाक, कान, घाँटी रोग, आँखा रोग, दाँत रोगलगायत बहिरंग सेवाको निःशुल्क उपचार हुनेछ ।

त्यस्तै पित्तथैलीसम्बन्धी पत्थरी, पिसाबथैली तथा मिर्गौला, नाक, कान तथा घाँटी, हर्निया, हाइड्रोसिल, एपेन्डिक्स र अन्य शल्यक्रियासमेत निःशुल्क रूपमा हुने शिविर संयोजक डा. यादवले बताए । शिविरमा फिजियोथेरापी, प्याथोलोजी सेवा, भिडियो एक्स–रे र एक्स–रे सेवा पनि निःशुल्क रूपमा प्रदान गरिने जनाइएको छ । औषधिलगायत अन्य खर्चका लागि नेपाल सरकारको रु. ७० लाख तथा पूर्वराज्यमन्त्री डा. यादवको संसदीय विकास कोषको रु. २० लाख गरी रु. ९० लाख खर्च गरिने बताइएको छ ।
रासस