धेरै कर तिर्ने १५ करदाता सम्मानित


आठौँ राष्ट्रिय कर दिवसका अवसरमा आइतबार राजधानीमा आयोजित समारोहमा करदातालाई प्रोत्साहन गर्ने उद्देश्यले आन्तरिक राजस्व विभागले उत्कृष्ट १५ करदातालाई सम्मान गरेको छ । कार्यक्रममा अर्थमन्त्री डा. युवराज खतिवडाले विभिन्न विधामा बढी कर तिर्ने उनीहरूलाई सम्मान गरेका हुन् ।

सो अवसरमा बहुराष्ट्रिय कम्पनी सूर्य नेपाल प्रालि सबैभन्दा बढी कर तिर्ने करदाताका रूपमा सम्मानित भएको छ । यसअघि पनि तीनपटकसम्म सूर्य नेपाल सबैभन्दा बढी कर तिर्ने कम्पनीको सूचीमा थियो । व्यक्तिगत आयकरतर्फ सबैभन्दा बढी कर तिर्ने करदाताका रूपमा सिद्धार्थशमशेर जबरा सम्मानित भए । सबैभन्दा बढी आयकर तिर्ने करदाताका रूपमा उनी यसअघि पाँचपटक सम्मानित भइसकेका छन् ।

यस्तै, डाबर नेपाल, जगदम्बा स्टिल, अन्नपूर्ण एग्रो छिमेकी लघुवित्त बैंक, राष्ट्रिय वाणिज्य बैंक, नेपाल लाइफ इन्स्योरेन्स, मणिपाल मेडिकल कलेज, वल्र्डलिंक र अग्नि इन्कर्पाेरेट आ–आफ्नो विधामा बढी कर तिर्नेको सूचीमा परेर सम्मानित भएका छन् । तारागाउँ रिजेन्सी होटेल र मध्यमस्तरीय करदाताको तर्फबाट कामना सेवा विकास बैंक, आन्तरिक राजस्वको कार्यालयको कार्यक्षेत्रमा रही धेरै आयकर तिर्नेमा भीएस सर्भिसेस मोरिसस प्रालि सम्मानित भएका छन् ।

समयमै कर बुझाउने तथा सबैभन्दा बढी मूल्य अभिवृद्धि कर तिर्नेमा भने घोराही सिमेन्ट सम्मानित भएको छ । यसपटक सम्मान प्राप्त गर्नेमध्ये सूर्य नेपाल, सिद्धार्थशमशेर जबरा, घोराही सिमेन्ट, ताराजागउँ रिजेन्सी, छिमेकी लघुवित्त, डाबर नेपाल भने दोहोरिएका हुन् ।
rss

प्रतिक्रिया