१५ वर्षीया किशोरीलाई बलात्कार गरेको अभियोगमा उदयपुर जिल्लाको त्रियुगा नगरपालिका–९ गैरुनका एक २५ वर्षीय युवालाई जिल्ला अदालत उदयपुरले सात वर्षको जेल सजाय र पाँच हजार दण्ड जरिवानाको फैसला गरेको छ । २५ वर्षीय विनोद परियारका विरुद्धमा अदालतले उक्त फैसला सुनाएको हो ।

विसं २०७५ माघ २९ गते परियारले किशोरीलाई बलात्कार गरेको पीडितका आफन्तले प्रहरीमा जाहेरी गरेपछि फागुन २६ गते पक्राउ गरेर चैतदेखि अभियुक्तलाई बलात्कारसम्बन्धी मुद्दा चलाइएको थियो ।

जिल्ला अदालत उदयपुरका स्रेस्तेदार राजकुमार आचार्यले जनाएअनुसार जिल्ला न्यायाधीश दीपक खनालको इजालासले परियारलाई सात वर्षको जेल सजाय र पीडितलाई पाँच हजार क्षतिपूर्ति भराउने फैसला गरेको हो ।

यसैबीच १४ वर्षीया किशोरीलाई भगाएर विवाह गर्ने एक किशोरलाई प्रहरीले बालविवाहको आरोपमा पक्राउ गरेको छ । पक्राउ पर्ने किशोर कटारी नगरपालिका–६ का २० वर्षीय सरोज गिरी रहेको इलाका प्रहरी कार्यालय कटारीले बताएको छ ।