सत्तारुढ दल नेकपाको प्रधानमन्त्रीको सरकारी निवास बालुवाटारमा बसेको सचिवालय बैठकले सातै प्रदेशका लागि प्रदेश प्रमुखको नाम टुंगो लगाएको छ ।

सोमबार बिहानदेखि बसेको उक्त बैठकले सातवटै प्रदेशका लागि प्रमुखको नाम टुंगो लगाएको हो ।

नेकपाले सचिवालय बैठकले छनोट गरेका नामावलीलाई मन्त्रिपरिषद्ले राष्ट्रपतिसमक्ष सिफारिसका लागि पेस गरेपछि राष्ट्रपतिबाट नियुक्ति हुने संवैधानिक व्यवस्था छ । सातै प्रदेशका लागि सिफारिस भएका सबै नामावली नेकपा निकट हुन् ।

देउवा सरकारको पालामा नियुक्त भएका यसअघिका सातै प्रदेशका प्रदेश प्रमुखलाई मन्त्रिपरिषद्को सिफारिसमा हिजो (आइतबार) राष्ट्रपति विद्यादेवी भण्डारीले बर्खास्त गरेकी थिइन् । प्रदेश प्रमुखहरूको कार्यकाल पाँच वर्ष हुने संवैधानिक व्यवस्था भए पनि दुई वर्ष कार्यकाल बाँकी हुँदै उनीहरूलाई बर्खास्त गरिएको हो ।

प्रमुख प्रतिपक्ष नेपाली कांग्रेसले प्रदेश प्रमुखहरूलाई समय अगावै बर्खास्त गरिएको भन्दै सरकारको आलोचना गरेको छ ।

यसरी एकाएक बिना कारण सातै प्रदेशका प्रमुखलाई बर्खास्त गर्नु र बर्खास्त गरेकै भोलिपल्ट सत्तारुढ नेकपानिकटलाई नियुक्तिको सिफारिस गर्नुले आफ्ना मान्छेलाई भर्ती गर्न बर्खास्त गरिएको स्पष्ट भएको छ । यसअघि सरकारइतर पार्टीले दुईतिहाइ कम्युनिस्टको सरकारले देशलाई कम्युनिस्टमय बनाउँदै आएको आरोपलाई पनि यसले पुष्टि गरेको छ ।

कुन प्रदेशका लागि को सिफारिस ?

प्रदेश १ : विष्णु प्रसाईं (झापा)
प्रदेश २ : धर्मनाथ यादव (सिरहा)
प्रदेश ३ : अमिक शेरचन (चितवन)
गण्डकी प्रदेश : सोमनाथ प्यासी (कास्की)
प्रदेश ५ : तिलक परियार (बाँके)
कर्णाली प्रदेश : शर्मिला त्रिपाठी (काठमाडौं)
सुदूरपश्चिम प्रदेश : गोविन्द कलौनी (डडेल्धुरा)