अत्यधिक धुम्रपान गर्नेहरूलाई थोरै उमेरमा पनि बुढोजस्तो देखिने समस्या हुने एक अध्ययनले देखाएको छ । अमेरिकामा हालै सार्वजनिक भएको अध्ययन प्रतिवेदनका अनुसार चुरोट बढी सेवन गर्नेहरूलाई वास्तविक उमेरभन्दा बढी बुढो देखिने गरेको छ ।

ब्रिष्टोलको लुइस मिल्लार्ड विश्वविद्यालयका अध्येताहरूले गरेको अध्ययन प्रतिवेदन पीएलओएस जेनेटिक्समा प्रकाशित भएको हो । उमेरभन्दा छिट्टै बुढ्यौली अत्यधिक धुम्रपानका कारणले भएको हो कि बंशाणुगत कारणले भएको हो भन्ने तथ्य वैज्ञानिकहरूले छुट्याउन सक्ने पनि अध्ययनकर्ताहरूले जनाएका छन् ।

अध्ययनकर्ताहरूले अध्ययनमा सहभागीहरूलाई दुई समूहमा बाँडेर अध्ययन गरेका थिए । तीमध्ये एउटा समूह कहिल्यै धुम्रमान नगरेकाहरूको थियो भने अर्को समूह अहिले धुम्रपान गरिरहने वा विगतमा गरेकाहरूको थियो ।

अन्य कुरा समान रहेको अवस्थामा पनि धुम्रपान गर्ने र नगर्नेका बीचमा तुलना गर्दा धुम्रपान नगर्नेभन्दा धुम्रपान गर्नेहरू बढी बुढो देखिएको अध्ययन प्रतिवेदनमा उल्लेख छ ।

बढी धुम्रपान गर्नेहरूमा बुढ्यौली देखिने समस्यासँगै घाँटी, फोक्सो, आन्द्रा, छालालगायतमा अनेक समस्या देखिने गरेको उनीहरूले जनाएका छन् । धुम्रपानको असर उनीहरूले कति मात्रामा धुम्रपान गरेका छन्, त्यही मात्रामा असर पर्ने गरेको पाइएको पनि अध्ययनकर्ताहरूले बताएका छन् ।