खेलाडीलाई उपप्रधानमन्त्री पोखरेल निर्देशन– देशको प्रतिष्ठा बढाउने गरी प्रस्तुत हुनोस्



उपप्रधान एवं रक्षामन्त्री ईश्वर पोखरेलले नेपाल र नेपालीको गौरव र प्रतिष्ठा बढाउने ढंगबाट अनुशासित र मर्यादित भएर प्रतियोगितामा प्रस्तुत हुन खेलाडीलाई निर्देशन दिएका छन् । सातौँ विश्व सैनिक खेलकुद प्रतियोगितामा भाग लिन चीन आइपुगेका उपप्रधानमन्त्री पोखरेलले खेलाडीले गर्ने व्यवहारले देश र संगठनको छवि झल्कने भएकाले अनुशासित भई ज्ञानलाई कुशलतापूर्वक प्रयोग गर्न सुझाव दिए ।

उपप्रधानमन्त्री पोखरेलले भने, ‘यो खेलमा सहभागिता नेपालीका लागि निकै महत्वपूर्ण हो, सेनाका खेलाडीका लागि विशेष अवसरका रूपमा रहेको छ, नेपाल र नेपालीको छवि उच्च राख्ने गरी प्रतियोगितामा खेलाडीले प्रस्तुत हुनुपर्छ, प्रतियोगितामा भाग लिन पाउँदा हाम्रो गौरव बढेको छ । यहाँ हामीले राम्रो बोली, व्यवहार, चरित्र र क्रियाकलाप देखाउनुपर्छ ।’

पोखरेल चीनका रक्षामन्त्री विई फिङको निमन्त्रणामा चीन गएका हुन् । उनले खेलाडी रहेको स्थान र प्रशिक्षण स्थलको अवलोकनसमेत गरे । इन्टरनेसनल मिलिटरी स्पोर्टस् काउन्सिल (सीआईएसएम) को समन्वयमा यसपटकको गृष्मकालीन विश्व सैनिक खेलकुद प्रतियोगिता चिनियाँ जनमुक्ति सेनाले आयोजना गरेको हो । प्रत्येक चार वर्षमा हुने सो प्रतियोगितामा नेपाली सेनाले पहिलोपटक भाग लिएको हो ।

विश्वका सैनिकबीच हुने यस खेल प्रतियोगितालाई ठूलो तथा शक्तिराष्ट्रले निकै चासोका साथ हेर्ने गरेको पाइन्छ । खेल विधामा ४० नेपालीसहित विश्वका १० हजार ७१९ सैनिक खेलाडीले यस प्रतियोगिता प्रतिस्पर्धा गर्दै छन् । नेपालले १३ विधामा प्रतिस्पर्धा गर्दैछ । प्रतियोगिताको सम्पूर्ण तयारी पूरा गरिसकेको काउन्सिलका पदाधिकारीको शुक्रबार बसेको बैठकमा जानकारी दिइयो । उहान शहर होलहरू अहिले विदेशी खेलाडीले भरिभराउ भएको छ ।

मस्कट ‘विङविङ’ अर्थात् समुद्री माछा चयन गरिएको यो प्रतियोगितालाई सातौँ शान्ति खेलकुद नामाकरण गरिएको छ । नेपालसहित विश्वका १०५ मुलुकमा १० हजार ७१९ खेलाडीको सहभागिता रहेको यो सैनिक खेलकुद प्रतियोगिता कात्तिक १० गतेसम्म सञ्चालन हुनेछ ।

यस खेलकुद प्रतियोगितालाई ओलम्पिकपछिको दोस्रो ठूलो खेलकुद महोत्सवका रूपमा लिने गरिन्छ । प्रतियोगितामा दुई प्रदर्शनी खेलसहित २७ खेल समावेश गरिएको छ । यो प्रतियोगितामा विभिन्न विधा र समूहमा गरी ३२८ वटा प्रतिस्पर्धा हुनेछन् । आठौँ राष्ट्रिय खेलकुद प्रतियोगितामा स्वर्ण पदक विजेता र उत्कृष्ट प्रदर्शन गर्ने खेलाडीले यस प्रतियोगितामा प्रतिस्पर्धा गर्दै छन् ।

उक्त अवसरमा उपरथी शनिचन्द्रबहादुर सिंह र महासेनानी शशिकिरण रायमाझीले सातौँ प्रतियोगिताको वस्तुस्थिति र नेपाली खेलाडीको तयारी अवस्थाबारे जानकारी गराएका थिए । प्रतियोगिताको उदघाटन शुक्रबार राति ८ बजे हुँदै छ ।

नारायण न्यौपाने (रासस)

प्रतिक्रिया