कांग्रेस नेताले लिए दुर्घटनामा अभिभावक गुमाएका बालबालिकाको अभिभावकत्व





सिन्धुपाल्चोक बस दुर्घटनाका कारण अभिभावक गुमाएका बालबालिकालाई नेपाली काङ्ग्रेसका नेता मोहनबहादुर बस्नेतले निःशुल्क पठनपाठन गराउने भएका छन् । अस्पतालमा घाइतेलाई भेट्ने क्रममा नेता बस्नेतले दुर्घटनामा परेर अभिभावक गुमाएका बालबालिकाको अभिभावकत्व लिने घोषणा गरेका हुन् ।

यस्तै, पूर्वमन्त्री बस्नेतले सिन्धुपाल्चोकको इन्द्रावती गाउँपालिका भोटसिपामा शुक्रबार भएको दुर्घटनामा घाइते भएकाको उपचारका लागि तत्कालका लागि रु ५० हजार आर्थिक सहयोग गरेका छन् । शुक्रबार राष्ट्रिय ट्रमा सेन्टरमा उपचार गराइरहेका यात्रुलाई भेटेर उनले उक्त सहयोग गरेका हुन् ।

सो क्रममा उनले भने, ‘तत्कालका लागि रु ५० हजार आर्थिक सहयोग गरको हुँ, आवश्यक परे आगामी दिनमा पनि सहयोग गर्नेछु ।’

सिपाटारबाट काठमाडौं आउँदै गरेको हेलम्बु यातायातको बा २ ख २७१५ नम्बरको यात्रुबाहक बस दुर्घटना हुँदा १४ जनाको मृत्यु र दर्जनौँ यात्रु घाइते भएका थिए ।

बस्नेत सोही क्षेत्रबाट निर्वाचित भएर मन्त्रीसमेत बन्नुभएको थियो ।

प्रतिक्रिया