बैंक अफ काठमाडौंबाट भएको कर्जा हिनामिना प्रकरणमा प्रहरीले ११ जनालाई पक्राउ गरेको छ । प्रहरीको केन्द्र्रीय अनुसन्धान ब्युरो सीआईबीले बैंक अफ काठमाण्डूका तत्कालीन सीईओ अजय श्रेष्ठसहित ११ जनालाई पक्राउ गरेको हो ।

नक्कली जग्गा धितो राखेर चार करोड ५० लाख रुपैयाँ कर्जा प्रवाह गरी सर्वसाधारणको निक्षेप हिनामिना गर्ने कार्यमा संलग्न रहेको अभियोगमा उनीहरूलाई पक्राउ गरिएको हो ।

खोला बगिरहेको जग्गा धितो राखेर ऋण स्वीकृत गरेर ऋण प्रवाह कार्यमा उनीहरूको संलग्नता रहेको भन्दै उनीहरूलाई पक्राउ गरिएको हो । बैंकका कर्मचारीले खोला बगिरहेको जग्गा देखाएर नक्कली लालपुर्जा लिएर कर्जा स्वीकृत गरेका थिए । त्यस कार्यमा त्यति ठूलो रकम स्वीकृत गर्दा सीईओको पनि भूमिका रहेको भन्दै श्रेष्ठलाई समेतलाई सीआईबीले पक्राउ गरेको जनाएको छ ।

पक्राउ पर्नेमा तत्कालीन प्रमुख कार्यकारी अधिकृत सीईओ श्रेष्ठसहित चारजना पूर्वकर्मचारी र तीनजना वहालवाला कर्माचारी र चारजना ऋणी रहेका छन् । उनीहरू विभिन्न समयमा अलगअलग ठाउँबाट पक्राउ परेका हुन् ।

उक्त कर्जा प्रवाह बैंक अफ काठमाडौंको कमलादी शाखाबाट गरिएको थियो । हाल पक्राउ परेकाहरूमाथि अनुसन्धान भइरहेको बताइएको छ ।