गत वर्ष ‘मी टु’का विवादमा परेका बलिउडका विभिन्न पात्रमध्ये चर्चित संगीतकार तथा गायक अनु मलिकको नाम पनि अग्रपंक्तिमा थियो । ‘मी टु’ को आरोप लागेपछि मलिकलाई इन्डियन आइडलबाट निकालिएको थियो । चर्चित गायिका सोना मोहपात्रा र श्वेता पण्डितले अनु मलिकमाथि यौन शोषणको आरोप लगाएका थिए ।
सोना र श्वेताको आरोपकै कारण सोनी टीभीले गत वर्ष अनु मलिकलाई इन्डियन आइडलको जजबाट समेत निकालेको थियो । अहिले एक वर्षपछि इन्डियन आईडलको नयाँ संस्करणको आरम्भ हुँदैछ । उक्त नयाँ संस्करणको लागि सोनी टीभीले पुनः अनु मलिकलाई प्रमुख जजको रुपमा बोलाएको छ ।
‘मी टु’को आरोपी अनुलाई सोनीले पुनः इन्डियन आईडल शोमा जजको लागि बोलाएपछि गायिका सोना मोहपात्राले यसको विरोध गरेकी छिन् । उनले अनुलाई इन्डियन आईडलको शोमा जजको रुपमा बोलाउनु सम्पूर्ण अभिभावकको मुखमा थप्पड हान्नु हो भन्ने प्रतिक्रिया दिएकी छिन् । यो घटनाले आफ्नो सन्तानको उज्ज्वल र सुरक्षित भविष्य देख्न चाहनेहरुको लागि नकारात्मक सन्देश जाने उनको तर्क छ ।
सोनासँगै अर्र्की गायिका श्वेताले पनि अनुमाथि ‘मी टु’को आरोप लगाएकी थिइन् । श्वेताले आफु १५ वर्षको हुँदा अनुले ‘किस’ मागेको र सो किस गरेवापत एउटा गीत गाउन दिने वचन दिएको खुलासा गरेकी थिइन् । त्यस्तै चर्चित गायिका अलीशा चिनायले अनु मलिकले यौन शोषण गरेको आरोप लगाउँदै सोना र श्वेताले लगाएको आरोप सत्य भएको बताएकी छिन् ।
यतिबेला अनु मलिकले इन्डियन आइडलमा सुटिङ गरिरहेको स्रोतले बताएको छ । उक्त शोमा अन्य दुई प्रमुख जजमा नेहा कक्कर र विशाल डडलानी रहेका छन् । सन् २००४ देखि शुरु भएको इन्डियन आइडलमा अनुले हरेक संस्करणमा जजको भूमिका निभाउँदै आएका छन् ।
प्रतिक्रिया