आरजु राणाले निर्वाचन व्यवस्थापनसम्बन्धी प्रशिक्षण दिएको काङ्ग्रेसका महाधिवेशन प्रतिनिधिहरूले मज्जाले सुने, तर ‘सबभन्दा सुरक्षित निर्वाचन क्षेत्रबाट टिकट लिएर पनि तपाईं किन पराजित हुनुभयो’ भन्ने प्रश्न कसैले पनि गरेनन् । काङ्ग्रेसभित्र धर्मनिरपेक्षताको चार प्रमुख ठेकेदार मानिएकामध्ये एक विमलेन्द्र निधिले धर्मनिरपेक्षताबारे व्याख्या गरेको सुन्ने धैर्यचाहिँ महाधिवेशन प्रतिनिधिहरूले राखेनन् ।

आरजु राणालाई काङ्ग्रेसमा स्थापित गराउन केही सातायता महाधिवेशन प्रतिनिधिहरूलाई लक्षित गरी काङ्ग्रेसले प्रशिक्षण कार्यक्रम सञ्चालन गर्दै आएको छ । प्रदेश चार, पाँच र ६ मा कार्यक्रम सम्पन्न भइसकेपछि गत शुक्रबार र शनिबार (भदौ २० र २१) तीन नम्बर प्रदेशको केही जिल्लाका प्रतिनिधिहरूका लागि भक्तपुरमा प्रशिक्षण कार्यक्रम राखिएको थियो । बोडेस्थित कृषि विकास बैंकको सभाकक्षमा आयोजित प्रशिक्षणमा काठमाडौं, ललितपुर, भक्तपुर, काभ्रेपलाञ्चोक, सिन्धुपाल्चोक, रामेछाप र दोलखा जिल्लाका प्रतिनिधिहरूले भाग लिएका र, त्यसको उद्घाटन शेरबहादुर देउवाले गरेका थिए ।

भक्तपुर काङ्ग्रेसका सभापति दुर्लभ थापाको सभापतित्वमा भएको उक्त कार्यक्रमको उद्घाटन सत्रमा प्रशिक्षण प्रतिष्ठानका निर्देशक पुरुषोत्तम दाहालले पार्टीको आन्तरिक विषयमा विवाद उत्पन्न हुने कुनै प्रकारको अभिव्यक्ति नदिन आग्रह गरेका थिए । तर, तनहुँका रामचन्द्र पौडेलले दाहालको भनाइप्रति आपत्ति जनाउँदै जवाफ फर्काएका थिए । तीन नम्बर प्रदेशलाई कर्मभूमि बनाएर राजनीतिमा क्रियाशील नेताहरू डा. रामशरण महत र अर्जुननरसिंह केसीलाई कार्यक्रममा सहभागी गराइएको थिएन । झापाका कृष्ण सिटौलादेखि तनहुँका रामचन्द्र पौडेलसम्मलाई बोलाइएको कार्यक्रममा डा. महत र केसीलाई नबोलाइनुले प्रशिक्षण कार्यक्रम नै एक षड्यन्त्रको उपज भएको महसुस सहभागीहरूले गरेका थिए ।

उद्घाटनपछि २० गते नै शुरु भएको प्रशिक्षण शिविरमा पुरुषोत्तम दाहालले प्रजातन्त्रको मूल्यमान्यताबारे चर्चा गर्दै आफूद्वारा लेखिएको पुस्तक र प्रजातान्त्रिक आन्दोलनमा आफूले पु¥याएको योगदानबारे सविस्तार जानकारी गराएका थिए । त्यसपछि शेरबहादुर देउवाकी पत्नी आरजुले निर्वाचनको व्यवस्थापनबारे प्रशिक्षण दिएकी थिइन् । यसरी आरजुले निर्वाचन व्यवस्थापनबारे प्रशिक्षण दिइरहँदा त्यहाँ उपस्थित कसैले पनि आरजुलाई ‘चुनावी व्यवस्थापनबारे यति धेरै जानकार तपार्इं आफैँ कसरी पराजित हुनुभयो’ भनी प्रश्न गरेनन् ।

ज्ञातव्य छ, आरजु राणालाई गत निर्वाचनमा काङ्ग्रेसले सबैभन्दा सुरक्षित ठानेको निर्वाचन क्षेत्र (कैलाली ५) बाट उम्मेदवार बनाएको थियो । आफूलाई ‘टुरिस्ट’का रूपमा सम्बोधन हुन थालेपछि आरजुले तत्काल पाँच करोड रुपैयाँमा घर खरिद गरेर रातारात ‘स्थानीय बन्ने’ प्रयास पनि गरेकी थिइन् । यिनै आरजुलाई पार्टीको आगामी महाधिवेशनमा कुनै एक पदाधिकारीका रूपमा उम्मेदवार बनाइने योजना देउवाले बनाएका छन् । त्यसनिम्ति आरजुलाई देशभरिका महाधिवेशन प्रतिनिधिहरूका माझ लैजानुपर्ने भएकोले यतिबेला प्रशिक्षक बनाएर उनलाई देश घुमाउने कार्य भइरहेको छ । आरजुपछि डा. प्रभु बुढाथोकीले प्रशिक्षण कलाबारे बोलेका थिए । बुढाथोकीले बोल्दा सभाकक्षमा बीस प्रतिशत मानिस पनि बसेनन्, सबैजसो सहभागी बाहिरिएपछि उनले आफू निकै अपमानित भएको महसुस गरेका थिए ।

भोलिपल्ट भदौ २१ गते शनिबार खिलनाथ दाहालले विधानका बारेमा, हरिहर विरहीले कम्युनिस्टको नकारात्मक पक्षका विषयमा र सरकारको असफलताका बारेमा प्युठानका गोविन्द पोखरेलले सहभागीहरूलाई दीक्षित गरेका थिए । त्यसपछि विमलेन्द्र निधिले राष्ट्रियता, लोकतन्त्र, समाजवाद, गणतन्त्र, सङ्घीयता, समावेशिता, मिश्रित निर्वाचन प्रणाली, धर्मनिरपेक्षता, अहिंसा र शान्तिका विषयमा प्रशिक्षण दिन शुरु गरे । करिब दुई घन्टासम्म प्रशिक्षकका रूपमा उभिएका निधिले धर्मनिरपेक्षताको व्याख्या गर्न थालेपछि सहभागीको धैर्य टुट्यो । व्यापक विरोध र हुटिङ भयो, सहभागीहरूले निधि इसाईको दलाल भएको आरोप लगाए । महासमितिको बैठकका क्रममा हिन्दूराष्ट्रको मुद्दालाई लिएर दिएको निवेदनबारे किन छलफल गरिएन भन्ने प्रश्न उठाउँदै सहभागीहरूले निधिविरुद्ध हुटिङ गरेका थिए ।

त्यसपछि निधिले सशस्त्र प्रहरीका दुई हतियारधारीलाई मञ्चमा बोलाएर आफ्नो दायाँ र बायाँ राखे, निधिको यस्तो हर्कतको झन् ठूलो विरोध भयो । त्यसैबीच निधिले हिन्दू र बौद्ध धर्म छोडेर इसाई बनेका केही व्यक्तिहरूलाई आफ्नो मान्छेमार्फत ‘प्रोवोक’ गरे र हिन्दूराष्ट्र समर्थकविरुद्ध चिच्याउन लगाए । प्रशिक्षण शिविर तनावमय बन्यो र, झन्डै हात हालाहालको स्थिति उत्पन्न भयो । हिन्दूराष्ट्र समर्थक प्रतिनिधिहरूले आफूलाई सम्हालेका कारण अप्रिय स्थिति उत्पन्न हुन पाएन । निधिले राखेका दुई हतियारधारीलाई मञ्चबाट हटाउन लगाएर मात्र पुनः निधिलाई आफ्नो कुरा राख्न दिइयो । नरोत्तम वैद्य, राजुराज जोशी, कृष्णा अमात्य, ताराबहादुर कोइराला, लवश्री न्यौपाने र रामचन्द्र खड्कालगातका नेताहरू निधिका विरुद्ध सभाकक्षभित्र जोडदार रूपमा प्रस्तुत भएका थिए ।

यसरी तनावमय रूपमा सम्पन्न प्रशिक्षण शिविरबाट सहभागीहरूले के सिके होलान्, त्यसको अनुमान गर्न सकिन्छ । तीन नम्बर प्रदेशका रसुवा, नुवाकोट, धादिङ, चितवन र मकवानपुरका प्रतिनिधिको लागि हेटौँडामा प्रशिक्षण कार्यक्रम राखिने भएको छ । उक्त कार्यक्रममा सहभागी हुने हिन्दूराष्ट्र समर्थकहरूलाई कसरी तह लगाउने भन्ने विषयमा विमलेन्द्र निधि र आरजु राणाले आफ्नो धर्म छोडेर इसाई बनेका प्रतिनिधिहरूसँग अनौपचारिक तहमा परामर्श गरिरहेको जानकारी प्राप्त भएको छ । ज्ञातव्य छ, मकवानपुर, चितवन, रसुवा, धादिङ र नुवाकोटका कैयन हिन्दू तथा बौद्धमार्गीहरू आफ्नो धर्म छोडेर इसाई बनेका छन् । कसैले हिन्दूराष्ट्रका पक्षमा र विमलेन्द्र–आरजुका विरुद्ध बोलेमा ठाउँका ठाउँ ठेगाना लगाउन इसाई प्रतिनिधिहरूलाई विशेष निर्देशन दिइने तयारी प्रशिक्षण प्रतिष्ठानका दुई मुख्य अगुवा निधि र आरजुबाट भइरहेको बुझिएको छ ।