कोरियन भाषा पढ्न आएका विद्यार्थी बसेको भ्याली इन्टिच्युटमा मृत्यु भएका वालकृष्ण जैसीको मृत्युका बारेमा प्रहरीले छानबिन नगरेकोप्रति राष्ट्रियसभाको बैठकमा सांसद भैरवसुन्दर श्रेष्ठले गृहमन्त्री रामबहादुर थापाको ध्यानाकर्षण गराएका छन् ।

राष्ट्रियसभाको विशेष समयमा सांसद श्रेष्ठले भने, ‘सुर्खेत जिल्लाको हरिसुन्दर जैसीका छोरा बालकृष्ण जैसीको मृत्युपछि प्रहरीमा किटानी जाहेरी दिँदा पनि प्रहरीले छानबिन गरेको छैन, म यस कुरामा गृहमन्त्रीको ध्यानाकर्षण गराउन चाहन्छु ।’

सांसद श्रेष्ठका अनुसार जैसी कोरियन भाषा सिक्न बसेको भ्याली इन्टिच्युट कीर्तिपुरका सञ्चालकका छोरा हराएपछि जैसीलाई दोष लगाइएको थियो । तर, प्रहरीले पक्राउ गरेर २४ घण्टा अुनसन्धान गर्दा आरोप लगाउने कुनै पनि आधार नभएको जनाएको थियो भने विद्यार्थी जैसी निर्दोष छन् भनेर प्रहरीले छाडेको थियो ।

अनुसन्धानपछि प्रहरीले जैसीलाई गत साउन २७ गते छाडेको थियो । प्रहरीले छाडेको तीन दिनभित्र जैसीको एकाएक मृत्यु भएको थियो ।

जबकि, परिवारले आरोपितको नाम राखेर प्रहरीमा किटानी जाहेरी दिँदा पनि छानविन गरेको छैन । सांसद श्रेष्ठले किटानी जाहेरी परेका व्यक्तिका बारेमा किन छानबिन हुन नसकेको हो भन्ने कुरामा गृहमन्त्रीको ध्यानाकर्षण गराउन चाहेको बताए ।