वर्ल्ड पुलिस एन्ड फायर गेम्समा निमेशको ‘ह्याट्रिक’

वर्ल्ड पुलिस एन्ड फायर गेम्समा निमेशको ‘ह्याट्रिक’


चीनको छेन्दुमा भइरहेको वर्ल्ड पुलिस एन्ड फायर गेम्समा नेपाली धावक निमेश गुरुङले तेस्रो स्वर्ण जित्दै ह्याट्रिक गरेका छन् । सिंगापुर पुलिस फोर्समा कार्यरत निमेशले आफूले भाग लिएका तीनवटै विधामा स्वर्ण जित्ने क्रममा भदौ १ गते आइतबार १० हजार मिटर दौडमा पनि स्वर्ण जितेका हुन् । प्रतिस्पर्धामा विभिन्न देशका ५५ खेलाडीले भाग लिएका थिए । त्यसअघि उनले हाफ म्याराथनमा १ घन्टा ९ मिनेट २६ मिनेटमा निर्धारित दूरी पार गरेर स्वर्ण जितेका थिए ।

निमेशले निर्धारित दूरी ३१ मिनेट १७ सेकेन्डमा पार गर्दै स्वर्ण जितेका हुन् । उनले चीन र भारतका खेलाडीलाई पछिपारेका थिए । दोस्रो भएका रेलवे पुलिस चीनका जेनुफेङ दाईले ३१ मिनेट ३५ सेकेन्डमा दौड पूरा गरेका थिए । भारतीय राष्ट्रिय पुलिसका गोभा रामले ३२ मिनेट २१ सेकेन्डमा दौड पूरा गरेर कास्यपदक हात पारे ।

सिंगापुर पुलिस फोर्समा कार्यरत भए पनि निमेश नेपाली पासपोर्ट बोक्छन् । जसकारण पदक तालिकामा उनको परिचय नेपाली भनेर उल्लेख गरिएको छ ।

पुलिस फायर गेम्समा विश्वभरका प्रहरीमा कार्यरत खेलाडीहरूको प्रतिस्पर्धा हुने गरेको छ । सन् १९८५ मा अमेरिकाबाट सुरु भएको प्रतियोगिताको हाल चीनमा १८औँ संस्करण संचालन भैरहेको छ ।

एक दशकदेखि सिंगापुर पुलिस फोर्समा कार्यरत निमेशले सन् २०१७ मा अमेरिकाको लस एन्जलजसमा भएको अघिल्लो संस्करणमा पनि हाफ म्याराथन र १० हजार मिटर दौडमा स्वर्ण जितेका थिए । संखुवासभामा जन्मिएका निमेश सिंगापुरका नाम चलेका धावकमा पर्छन् । प्रशिक्षकविनाका धावक निमेशले सन् २०१३ देखि दौडिन थालेका हुन् । उनले सन् २०१४ मा ५ हजार मिटर दौडमा सिंगापुरको २५ वर्ष पुरानो कीर्तिमान भंग गरेका थिए भने १० हजार मिटरको राष्ट्रिय कीर्तिमान पनि भंग गरेका थिए ।

सिंगापुर हुने स्थानीय प्रतियोगितमा हरेक साताजस्तो पदक जित्ने निमेशले २०१४ देखि हालसम्म झन्डै ६ दर्जन स्वर्णसहित ३ सयभन्दा बढी पदक जितिसकेका छन् । यस वर्ष उनले विभिन्न खेलका खेलाडीलाई पछि पार्दै सिंगापुर पुलिसको पिएसए उत्कृष्ट खेलाडीको अवार्ड पनि जितेका थिए ।