मित्रराष्ट्र भारतको ७३औं स्वतन्त्रता दिवसको उपलक्ष्यमा काठमाडौंस्थित भारतीय राजदूतावासले आज (०७६ श्रावण ३०) भद्रकालीस्थित सैनिक सभामण्डवमा विश्व विख्यात बाँसुरीवादक पण्डित हरिप्रसाद चौरसियाको सांगीतिक कार्यक्रमको आयोजना गऱ्यो । उक्त कार्यक्रममा उपप्रधानमन्त्री एवं स्वास्थ्य तथा जनसंख्यामन्त्री उपेन्द्र यादव र परराष्ट्रमन्त्री प्रदीपकुमार ज्ञवाली विशेष अतिथिका रुपमा उपस्थित थिए ।
राजनीतिज्ञ, कलाकार, संगीतकार, साहित्यकार, संचारकर्मी तथा विद्यार्थीलगायत विभिन्न क्षेत्रका झण्डै सात सयभन्दा बढी व्यक्ति–व्यक्तित्वको सो कार्यक्रमा उपस्थिति थियो ।
कार्यक्रममा पण्डित हरिप्रसाद चौरसियाका साथमा विवेक सोनार (बाँसुरी), देवोप्रिया रणदिवे (बाँसुरी), अमृता उप्रेती (तानपुरा) तथा शुभांकर बेनर्जी (तबला) थिए ।
ज्ञातव्य छ, पण्डित चौरसिया सांगीतिक क्षेत्रका विश्वप्रख्यात व्यक्तित्व हुन् । उनको सांगीतिक समूहले यस सांगीतिक प्रस्तुतिलाई साँच्चै नै अविस्मरणीय बनाएको अनुभूति उपस्थित सबैले गरे । उनले आधुनिक तथा शास्त्रीय बाँसुरी बादनको आफ्नो दैवीय क्षमताद्वारा समस्त दर्शकलाई मन्त्रमुग्ध बनाए, जसको प्रस्तुतिलाई काठमाडौंले लामो समयसम्म सम्झीरहने अनुभूति गराएको छ ।
प्रतिक्रिया