मंगलबार बिहान सप्तरीमा मेघगर्जनसहित आएको वर्षासँगै परेको चट्याङमा परेर दुईजनाको मृत्यु भएको छ । मृत्यु हुनेमा सप्तरीको सुरुंगा नगरपालिका–३ बस्ने ५५ वर्षीय हरिहर चौधरी र हनुमाननगर कंकालिनी नगरपालिका–११ का ४५ वर्षीया शिवसतीदेवी पण्डित रहेको प्रहरी नायब उपरीक्षक भावेश रिमालले बताए ।

खेतमा काम गरिरहेको अवस्थामा चौधरीको र खेतबाट घर फर्किने क्रममा पण्डितको चट्याङ लागेर मृत्यु भएको जिल्ला प्रहरी कार्यालय सप्तरीले जनाएको छ । चट्याङ लागेर गम्भीर घाइते भएका चौधरीलाई उपचारका लागि तत्कालै सप्तऋषि अस्पताल लहान लगेकामा उपचारका क्रममा मृत्यु भएको हो । खेतमा काम गरिरहेका आफ्ना पतिलाई खाना पुऱ्याएर घर फर्कने क्रममा चट्याङ लागेर पण्डितको ज्यान गएको प्रहरी नायब उपरीक्षक रिमालले जानकारी दिए ।