वालिङ नगरपालिकामा स्तनपान कक्ष सञ्चालन





स्मार्ट सिटीको अवधारणा ल्याएको वालिङ नगरपालिकाले कार्यालयभित्र स्तनपान कक्ष सञ्चालन गरेको छ । नगरपालिकामा विभिन्न कामका लागि आउने सेवाग्राही महिला तथा महिला कर्मचारीलाई लक्ष्य गरी कार्यालयभित्र सो कक्ष सञ्चालन गरिएको हो ।

कार्यालयमा सेवा लिन आउने महिला सेवाग्राहीले सार्वजनिक स्थलमा शिशुलाई स्तनपान गराउन लाज मान्ने गरेकाले उक्त कार्यालयले स्तनपान कक्ष निर्माण गरेको नगरपालिकाका प्रमुख प्रशासकीय अधिकृत गुरुदत्त सुवेदीले बताए ।

‘वालिङ नगरपालिका स्मार्ट सिटीको अवधारणामा अगाडि बढिरहेको छ,’ उनले भने, ‘स्तनपान कक्ष स्थापना गर्नेमा वालिङ सम्भवतः जिल्लाकै पहिलो कार्यालय पनि हो ।’ शिशुसहितका आमालाई कार्यालयमा आउँदा सार्वजनिक स्थलमा स्तनपान गराउन असहज हुने भएकाले तत्कालका लागि साधारण स्तनपान कक्ष स्थापना गरिएको र आगामी दिनमा यसलाई व्यवस्थित गर्दै लगिने जनाइएको छ ।

यो अभियानलाई आगामी दिनमा अन्य वडा कार्यालय परिसरमा पनि विस्तार गर्दै लगिने जानकारी दिँदै प्रमुख प्रशासकीय अधिकृत सुवेदीले यो कार्यको थालनीसँगै वालिङलाई महिलामैत्री, बालबालिकामैत्री र अपांगतामैत्री नगरपालिकाको रूपमा समेत स्थापित गर्ने पहल भइरहेको बताए ।

प्रतिक्रिया