जासुसी आरोपमा ३० जनालाई मृत्युदण्डको फैसला

जासुसी आरोपमा ३० जनालाई मृत्युदण्डको फैसला


विद्रोहीको नियन्त्रणमा रहेको यमनको राजधानी सानास्थित एक अदालतले साउदी गठबन्धनका निम्ति जासुसी गरेको आरोपमा ३० जनालाई मृत्युदण्डको फैसला गरेको छ ।

मृत्युदण्डको सजाय सुनाइएकामा इस्लाहा पार्टीसँग आबद्ध रहेका प्राज्ञहरू, प्राध्यापकहरू र विद्यार्थी रहेका छन् । यमनमा यो समूहलाई मुस्लिम ब्रदरहुडको नामले चिनिन्छ ।

यी व्यक्तिलाई सन् २०१६ मा हुथी विद्रोहीको सुरक्षा अभियानका क्रममा पक्राउ गरिएको थियो । नाम नबताउने सर्तमा एक अधिकारीले अदालतको आदेशका विरुद्ध अपिल गरिने जानकारी दिए ।

एमनेस्टी इन्टरनेसनलले अदालतको आदेश ‘कानुनको उपहास’ भएको जनाउँदै गिरफ्तारीमा परेका सबैलाई तत्काल रिहा गर्न हुथी विद्रोहीसँग आग्रह गरेको छ ।

यमनमा विगत चार वर्षदेखि इरान समर्थित हुथी विद्रोही र साउदी अरेबियासमर्थित तथा अन्तर्राष्ट्रिय रूपमा मान्यताप्राप्त सरकारी फौजबीच भीषण युद्ध जारी छ । यमन युद्धमा हजारौँको ज्यान गइसकेको छ भने लाखौँ मानिस घरबार छाडेर अन्यत्र पलायन भएका छन् ।