खाना खान बोलाएर सामूहिक बलात्कार, गुहार माग्ने पनि जोगिन सकिनन्

खाना खान बोलाएर सामूहिक बलात्कार, गुहार माग्ने पनि जोगिन सकिनन्


रूपन्देहीमा दुई युवतीमाथि सामूहिक बलात्कार भएको छ । गैडहवा गाउँपालिकाका २२ वर्षका दुई युवतीलाई असार २ गते राति युवाको समूहले बलात्कार गरेको हो । पीडकले घटना सार्वजनिक गरे ज्यान मार्ने धम्की दिएकाले बाहिर ल्याउन ढिलाइ भएको स्थानीयवासीले बताए ।

प्रहरीले घटनामा संलग्न रहेको आरोपमा गैडहवा गाउँपालिका–८ का जीवन ज्ञवालीलाई पक्राउ गरेको छ भने अर्का अरोपी विष्णु थारूसहित अन्य व्यक्ति फरार रहेको इलाका प्रहरी कार्यालय लुम्बिनीले जनाएको छ । पक्राउ परेका ज्ञवालीलाई जबर्जस्ती करणीको आरोपमा मुद्दा दर्ता गरी कारबाही प्रक्रिया अगाडि बढाइएको प्रहरी निरीक्षक शंकर पोखरेलले जानकारी दिए ।

घटना विवरणअनुसार ती दुई युवतीलाई स्थानीय विष्णु थारूले असार २ गते साँझ खाजा खानका लागि बोलाएका थिए । बेलुका खाजा खाएर फर्किँदै गर्दा विष्णुले अन्य दुई युवालाई बोलाएर युवतीमाथि जबर्जस्ती गर्न थालेपछि एक युवती भागेकी थिइन् । अर्की युवतीलाई भने उनीहरूले बलात्कार गरेका थिए । भागेकी युवतीलाई हसनापुर गाउँमा स्थानीयवासी जीवन ज्ञवालीसहित चारजनाले बलात्कार गरेका हुन् ।

गुहार माग्दै गएकी उनलाई युवाहरूले भेटेपछि उल्टै बलात्कार गरेको पीडितको भनाइ उद्धृत गर्दै गैडहवा–९ का अध्यक्ष टेकबहादुरले बलालले बताए । ‘युवतीहरूले भनेअनुसार घटनामा धेरैजना संलग्न छन्, तर प्रहरीले एकजनालाई मात्रै समातेको छ । अरू व्यक्तिलाई पनि पक्राउ गरेर कारबाही गर्नुपर्छ,’ उनले भने, ‘युवतीहरूले न्याय पाउनुपर्छ ।’ सामूहिक बलात्कारपछि गम्भीर बनेका दुवै युवतीको स्वास्थ्य उपचार गरिएको छ । उनीहरूको स्वास्थ्य अवस्था सामान्य रहेको अध्यक्ष बलालले बताए ।

गाउँपालिका प्रमुख बच्चुलाल केवटले घटनामा संलग्न सबैलाई कारबाहीको दायरामा ल्याउनुपर्ने बताए । उनले पीडितलाई न्याय र पीडकलाई कानुनी कारबाहीका लागि पहल गरिएको जानकारी दिए ।