इराकको किर्कुक शहरमा बिहीबार भएको शक्तिशाली विस्फोटनमा कम्तीमा चारजनाको ज्यान जानुका साथै अरू २० जना घाइते भएका स्थानीय प्रहरीले जनाएको छ ।

प्रहरीका अनुसार किर्कुकको मुख्य सडकमा ६ वटा बम विस्फोट गराइएको थियो । किर्कुक राजधानी बग्दादबाट करिब २५० किलोमिटर उत्तरमा रहेको छ । किर्कुकका प्रान्तीय प्रहरी प्रवक्ता अम्मार अल जुबोरीले उक्त विस्फोटका कारण एकजना प्रहरीको पनि मृत्यु भएको जानकारी दिए ।

सुरक्षाकर्मीले किर्कुक विस्फोटबारे अनुसन्धान थालेको छ । सडकमा बम राख्दै गरेको देखिएका दुईवटा शंकास्पद कारको खोजी भइरहेको उनले बताए ।

मिश्रित जातीय बसोवास रहेको किर्कुकको केही भाग अर्धस्वशासित कुर्दिस्तान पनि रहेको छ ।
उक्त आक्रमणको कुनै पनि समूहले जिम्मेवारी लिएको छैन, तर इस्लामिक स्टेट्सले किर्कुकमा सुरक्षाफौजमाथि लक्षित गरी निरन्तर आक्रमण गर्ने गरेका छन् । यही समूहले मानिसहरूको भिडभाड हुने स्थान, बजार, कफी पसल तथा मस्जिदलाई पनि लक्षित गर्ने गरेका छन् ।

सन् २०१७ मा इराकी सुरक्षाफौजले आईएसलाई पराजित गरेयता ठूला आक्रमणका घटनामा नाटकीय रूपमा कमी आएको छ । तर, आईएसका लडाकुहरू अझै पनि शहरी इलाकामा लुकेर बसेका र बेलाबखत आक्रमण गर्ने गरेको देखिएको छ ।