दुई साताअघि सरकारसँग ११बुँदे समझदारी गरेर मूलधारको राजनीतिमा आएका भनिएका सीके राउत नेतृत्वको स्वतन्त्र मधेश गठबन्धनको बैठकले पार्टीको नाम ‘जनमत पार्टी’ राख्ने निर्णय गरेको छ । सिरहाको लहानमा दुई दिनसम्म चलेको गठबन्धनको राष्ट्रिय परिषद् बैठकले पार्टीको नाम जनमत पार्टी राख्ने निर्णय गरेको हो ।
स्वतन्त्र मधेश गठबन्धन’का नाममा सक्रिय राउतले सरकारसँग एकाएक गरेको सहमतिपछि यसरी पार्टीको नाम फेरेको सन्दर्भलाई मिश्रित रुपले हेरिएको छ । कतिपयले यस कदमलाई सकारात्मक मान्दै राउतले पृथकतावादी लाइन त्यागेको अर्थमा बुझेका छन् भने धेरैले उनको यस निर्णयलाई थप शंकास्पद तथा रहश्यको रुपमा अर्थ्याएका छन् ।
राउतले दलको नाम ‘जनमत’ राख्नु अर्थपूर्ण
सीकेसँग सरकारले गरेको सहमतिसँगै ‘जनअभिमत’ र ‘जनमत संग्रह’ शब्दमा विवाद र बहस चर्किरहेको परिवेशमा राउतले दलको नाम नै ‘जनमत’ राख्नुलाई अर्थपूर्ण ठानिएको छ ।
सिरहाको लाहानमा सम्पन्न बैठकपछि पार्टीका केन्द्रीय सदस्य अब्दुल खानले सोमबार जारी गरेको प्रेस विज्ञप्तिमा जनाइएअनुसार जनमत पार्टीको अध्यक्षमा सिके राउतलाई चयन गरिएको छ भने पार्टीको केन्द्रीय कमिटी ३५ सदस्यीय रहनेछ ।
बैठकले पार्टीको झण्डा रातो, सेतो र हरियो रङको ठाडो धर्काको बीचमा बीचको सेतो स्ट्रिपमा रातो रङको अष्टदल रहने निर्णय गरेको पनि सो विज्ञप्तिमा जनाइएको छ ।
पार्टीले चुनाव चिह्न ‘अष्टदल’ दाबी गर्दै निर्वाचन आयोगमा निवेदन दिने निर्णय गरेको समेत उल्लेख गरिएको उक्त विज्ञप्तिअनुसार निर्वाचन आयोगमा दल दर्ता भएपछि हाल कायम रहेको केन्द्रीय समिति थप विस्तार गरिने छ ।
प्रतिक्रिया