मलेसियामा ४० टनभन्दा बढी फोहोर नदीमा फालेपछि यसबाट फैलिएको प्रदूषित हावाका कारण कैयौँ बालबालिकासहित झण्डै दुई हजार व्यक्ति बिरामी भएका छन् ।
स्थानीय अधिकारीहरुले दिएको जानकारी अनुसार नदीको पानीमा मिसाइएको विषाक्त रसायनबाट निस्केको ग्यास वातावरणमा फैलिँदा मलेसियाको दक्षिणी जोहोर राज्यमा ठूलो सङ्ख्यामा स्थानीय नागरिक बिरामी परेका हुन् । हावामा विषाक्त ग्यास फैलिएका कारण बालबालिका तथा वृद्धवृद्धामा यसको प्रभाव बढी परेको बताइएको छ ।
घटनापछि जोहोर राज्यमा रहेका झण्डै दुई सय विद्यालय तथा पूर्व प्राथमिक विद्यालय बन्द गरिएको छ । गत हप्ता फालिएको विषाक्त पदार्थले असर गर्नसक्ने देखिएपछि ती शैक्षिक संस्थाहरू बन्द गरिएको अधिकारीहरूले जनाएका छन् ।
विषाक्त पदार्थले असर गरेका व्यक्तिहरुलाई अरुची हुने, टाउको दुख्ने, बान्ता हुनेलगायतका समस्या देखिएको छ । बिरामी भएकामध्ये केहीको अवस्था चिन्ताजनक रहेको उपचारमा संलग्न स्वास्थ्यकर्मीहरूले जानकारी दिएका एएफपीले जनाएको छ ।
विषाक्त पदार्थका कारण दुई हजार ३५५ जना बिरामी भएकोमा ११३ जना अझै पनि उपचारका लागि अस्पतालमै रहेको उनीहरुको भनाइ छ । अहिलेसम्म मृत्यु भने कसैको पनि नभएको अधिकारीहरुले स्पष्ट पारेका छन् ।
औद्योगिक शहर पासिर गुडाङको नदीमा भएको यो समस्या अन्यत्र फैलिन र थप अरूलाई असर पर्न नदिन तत्काल समाधान गर्ने प्रयास भइरहेको जानकारी दिइएको छ ।
घटनामा दोषी भएको आशङ्कामा तीन जनालाई नियन्त्रणमा लिइएको र उनीहरु दोषी ठहरिएमा वातावरण संरक्षणसम्बन्धी ऐनअनुसार पाँच वर्षसम्म जेल सजाय हुनसक्ने बताइएको छ ।
प्रतिक्रिया