पछिल्ला केही महिनायता सरकारले नेपाल कम्युनिष्ट पार्टीका नेता–कार्यकर्तालाई गिरफ्तार गर्ने कार्यलाई निकै प्राथमिकता र तिव्रता दिएको महसुस गरिएको छ । विप्लव नेतृत्वको सो पार्टीका विरुद्ध एमाले–माओवादी केन्द्र गठबन्धनको सरकार यसरी खनिनुको एक विशेष कारकतत्वको रूपमा प्रचण्ड रहेको ठहर नेकपाले गरेको बुझिएको छ । नेपाल कम्युनिष्ट पार्टीका प्रवक्ता प्रकाण्डले यसको खुलासा गरेका छन् ।

प्रकाण्डको भनाईअनुसार नेकपा तथा यस पार्टीको नेतृत्वमा सञ्चालित एकीकृत जनक्रान्तिका विरुद्ध कथित ओली–प्रचण्ड गठबन्धन सरकार आफ्नो जन्मकालदेखि नै दमनमा उत्रिँदै आएको छ । यो गठबन्धनको ध्याउन्न नै नेकपा र एकीकृत जनक्रान्तिलाई सिध्याउनुमा रहेको उनको भनाई छ । एक विज्ञप्तिमार्फत प्रकाण्डले दाबी गरेअनुसार सरकारी गतिविधिबारे अहिलेसम्मका घटनाक्रम, तथ्य र सूचनाले दमन–अभियानको रणनीति तय गर्नेमा ओलीलाई प्रचण्डले उछिनेका छन् । नेकपा र यसले सञ्चालन गरेको ‘एकीकृत जनक्रान्ति’को हत्यामा यो ग्याङ (प्रचण्डनेतृत्वको दल)को राजनीतिक भविष्य र जीवन रहेको जस्तो व्यवहार प्रचण्डले गरेको प्रकाण्डले सङ्केत गरेका छन् ।

प्रकाण्डले दाबी गरेअनुसार सरकारी गतिविधिबारे अहिलेसम्मका घटनाक्रम, तथ्य र सूचनाले दमन–अभियानको रणनीति तय गर्नेमा ओलीलाई प्रचण्डले उछिनेका छन् ।

सरकारद्वारा देशव्यापी रूपमा गरिएको नेकपाका विभिन्न तहका नेता–कार्यकर्ताको फेहरिस्तसमेत उल्लेख गरिएको प्रकाण्डको वक्तव्यमा भनिएको छ– ‘दमनको क्रममा सरकारले गत महिना हाम्रो पार्टीका केन्द्रीय सदस्य एवम् कोशी ब्यूरो इञ्चार्ज क. किरणलगायत ८ जना कमरेडहरूलाई धनकुटाको हिलेबाट अनाहक गिरप्तार गर्यो । हाल झुठा मुद्दामा फसाएर हिरासतमा राखेको छ । भरखरै काठमाडौंबाट महिला संगठनकी महासचिव तथा काठमाडौं जिल्ला सेक्रेटरी क. धिरिन्द्रा उपाध्याय, ललितपुर जिल्ला सेक्रेटरी क. विपिन, युवा संगठनका अध्यक्ष क. विवशलगायत ६ जना कमरेडहरूलाई उपत्यकाबाट गिरप्तार गरियो । हाल ओली सरकारले ज्यान मार्ने उद्योग र विस्फोटक पदार्थसम्बन्धी झट्टा मुद्दामा फसाउने प्रपञ्च गर्दैछ । क. धिरिन्द्रा र क. विवशलार्ई अमानवीय यातना दिइराखेको छ । कपिलवस्तुमा साँस्कृतिक कार्यक्रम देखाइरहेको स्थानबाट साँस्कृतिक टिमको संयोजक क. देवराज विक र जिल्ला सदस्य क. शम्भु थारु, कृपाल कोरी र मकवानपुरबाट जिल्ला सेक्रेटरी क. वाटर लगायतलाई गिरप्तार गरेको छ ।’

सरकारले आफ्नो पार्टीका विरुद्ध सञ्चालन गरेको दमन अभियान र नेता, कार्यकर्तालाई गरेको गिरप्तारीविरुद्ध सो पार्टीले संघर्ष र विरोधको रुपमा वैशाख २२ गते शनिबार नेपाल बन्दको कार्यक्रम आयोजना गरेको र बन्द कार्यक्रम पूर्ण रुपमा सफल रहेको पनि प्रकाण्डले उल्लेख गरेका छन् ।

बन्दको तयारी र कार्यन्वयनको क्रममा नवलपरासीबाट पार्टी जिल्ला सदस्य शक्ति, प्युठानबाट जिल्ला इञ्चार्ज चिन्तामणी र जिल्ला सदस्य केशव, बाग्लुङबाट जिल्ला इञ्चार्ज विकिरण र जिल्ला सदस्य समित विराटनगरबाट गणेश, जनकपुरबाट विजय, सिराहाबाट जिल्ला इञ्चार्ज अनुकूल, चितवनबाट नारायण, प्रदिप र केशव, खैरेनीबाट पाँचजना जनता, पश्चिम दाङबाट अर्जुनसहित दुईजनालगायत दर्जनौं गिरप्तारीमा परेको उनले जनाएका छन् । गिरप्तार गरिएका पार्टीका नेता र कार्यकर्तालाई रिहा गर्नुको सट्टा थप नेता, कार्यकर्ता र जनताको गिरप्तारी गरेकोप्रति सरकारको विरोध र भत्र्सना गर्दै प्रकाण्डले सीघ्र रिहाईको माग गरेका छन् । अन्यथा नेकपा ‘जनप्रतिरोध सङ्घर्ष’मा उत्रिने र त्यसको जिम्मेवार प्रचण्ड–ओली गठबन्धनको सरकारले लिनुपर्ने उनले जनाएका छन् ।