दुई पार्टी बीचको एकता घोषणाको मिति आउँदो वैशाख १४ गते तय गरिने नेकपा (माओवादी केन्द्र)का अध्यक्ष प्रचण्डले खुलासा गरेका छन् । प्रेस सेन्टर चितवनले आयोजना गरेको पत्रकार सम्मेलनलाई सम्बोधन गर्दै उनले मे १ वा मे ५ मा पार्टी एकता घोषणा गर्ने कोशिश भइरहेको जानकारी दिए ।

दुई पार्टीका अध्यक्षले पर्याप्त समय निकाल्न नसकेका कारण एकतामा ढिलाइ भएको स्वीकार्दै उनले भने, ‘प्रधानमन्त्रीजीको व्यस्तता हुने नै भयो । म पनि व्यस्त नै छु । यसले थोरै ढिलो भएको हो । समय निकालेर छलफलमा बसेमा कुरो टुंगिने छ ।’

पार्टी एकतामा त्यस्तो जटिल केही नरहेको जानकारी दिँदै उनले दुईचार दिन ढिलो होस् तर राम्रो होस् भन्नेतर्फ आफूहरुको ध्यान गएको जनाए । हतारमा एकता गर्ने, पछि गएर यी कुरा पहिले नै सल्लाह गर्नुपर्ने भन्ने नहोस् भन्ने आफ्नो चाहना रहेको उनको तर्क छ ।

सोही अवसरमा उनले एमाले अध्यक्ष केपी शर्मा ओलीले जुत्ताअनुसारको खुट्टा बनाउने भनी भनेको सन्दर्भलाई प्रतीकात्मक भनाई भन्दै बचाओट गरे र भने, ‘लेनिनले के गर्ने भन्ने पुस्तक लेख्दा बरु सय चोटि नाप्ने तर खुट्टा अनुसारको जुत्ता बनाउने भन्ने कुरालाई उहाँले प्रतीकात्मक रुपमा उठाउनुभएको हो । हामी त्यस्तो ठाउँमा आएका छौं । खुट्टा काटेर भए पनि जुत्ता मिलाउनुपर्ने छ भन्नुभएको हो ।’

भारतीय प्रधानमन्त्री नरेन्द्र मोदीको हुन गइरहेको नेपाल भ्रमणले दुई देशबीचको सम्बन्ध सुदृढ गर्न मद्दत पुग्ने विश्वास उनले व्यक्त गरे । प्रचण्डलाई उद्धृत गर्दै राससले जनाएअनुसार प्रधानमन्त्री मोदीको जनकपुर र मुक्तिनाथ जाने काम धेरै पहिलेदेखि रोकिएकोले यसपटक मोदी ती स्थानमा पुग्नेछन् । अरू छलफल पनि यसपटक हुने कार्यक्रम रहेको उनले जानकारी दिँदै उनले दुई देशबीचको सम्बन्ध सुधार भइरहेको बताए ।