विवादका कारण लामो समयदेखि नेतृत्व रिक्त रहँदै आएको नेपाली कांग्रेसको भ्रातृ संगठन नेपाल विद्यार्थी संघ कास्कीले नेतृत्व पाएको छ । करिब ९ बर्षको विवाद र डेढ वर्षको नेतृत्व रिक्तता अन्त्य गर्दै नेविसंघ केन्द्रले नयाँ सभापति नियुक्त गरेपछि नेविसंघ कास्कीको नेतृत्व–अवरोध अन्त्य भएको हो ।

नेविसंघ अध्यक्ष नैनसिंह महरले विकास थापालाई कास्की नेविसंघको सभापति चयन गरेका हुन् । संगठन विस्तार गरी तीन महिनाभित्रै जिल्ला अधिवेशन गर्नुपर्ने जिम्मेवारीसहितको नियुक्ति पत्र हिजो शुक्रबार पठाइएको बुझिएको छ ।

‘बर्षौंदेखिको विवाद र रिक्तताले कास्कीको सांगठानिक गतिविधि कमजोर भैरहेको थियो’, अध्यक्ष महरले भने– ‘रिक्त पदपुर्ति गरेर संगठनलाई चुस्त बनाउन सभापति चयन गरिएको हो ।’ जिल्ला र केन्द्रिय नेताहरुको सुझावका आधारमा थापालाई सभापति बनाएको महरले बताएका छन् ।

नवनियुक्त सभापति थापा यसअघि नै कास्की नेविसंघको कार्यवाहक सभापति भएर काम गरिसकेका व्यक्ति हुन् । २०६० देखि विद्यार्थी राजनीतिमा सक्रिय थापा २०६७ सालमा नेविसंघ कास्कीको सदस्य बनेका थिए । २०६९ मा कास्की नेविसंघ कोषाध्यक्ष, २०७० क्याम्पस समन्वय समितिको सभापति, २०७१ मा कास्की नेविसंघको उपसभापति हुँदै २०७२ कार्यबाहक सभापति भएर काम गरेका छन् । उनी हाल पोखरा विश्वबिद्यालयमा एमविए अध्ययनरत छन् ।