इण्डियन आयल कर्पोरेशन (आईओसी) ले इन्धनको मूल्य घटाएको सूची पठाएपनि नेपाल आयल निगमले भने मूल्य नघटाउने भएको छ । आईओसीले मूल्य बढाउँदा नेपालमा पनि मूल्य बढाउने निगमले भारतमा मूल्य घट्दा भने नेपालमा नघटाएको हो ।

निगमले अझै पाक्षिक रुपमा करोड रुपैयाँ बढी नोक्सान भएको जिकिर गर्दै मूल्य नघटाउने जनाएको छ । भारतमा विगत १० दिनदेखि क्रमिक रुपमा पेट्रोलियम पदार्थको मूल्यमा गिरावट आएको छ । इरानमा पेट्रोलियम पदार्थको उत्पादन बढ्ने भएपछि भारतमा पेट्रोलियम पदार्थको मूल्य घटेको हो । शुक्रबार ब्रेन्ट क्रुड आयलको मूल्य घटेर प्रतिव्यारेल ६४ दशमलव ३३ डलरमा झरेको छ ।

अघिल्लो महिना प्रतिव्यारेल ७१ डलर थियो । भारतमा पेट्रोलमा ८९ पैसा र डिजेलमा १ रुपैयाँ मूल्य घटेको छ । इण्डियन आयलले घटेको मूल्य पठाउँदा नेपालमा घट्ने र बढी पठाउँदा बढ्ने स्वचालित मूल्य प्रणाली लागु भएपनि आयल निगमले यसको पालनामा भने अटेरी गर्दै आएको छ । पेट्रोलियम पदार्थमा केही महिनादेखि निगम घाटामा गएको भन्दै मूल्य यथावत राखिएको निगम स्रोतले जानकारी दिएको छ ।

निगमले १५ दिनको अबधिमा निगमलाई १४ करोड ९२ लाख रुपैयाँ घाटा भएकोमा अहिले पेट्रोल र डिजेलको मूल्य घटेर आएकोले आगामी १५ दिनको अबधिमा ७ करोड १५ लाख रुपैयाँ मात्रै घाटा हुनेछ ।