राजन घिमिरे, सिड्नी

गैरआवासीय नेपाली संघ अष्ट्रेलियाले आगामी मार्च १० तारिख शनिबारका दिन अष्ट्रेलियाको सिड्नीमा ‘वाक फर वेलफेयर वेलफेयर फर ओमन’ नारासहित वाकाथन कार्यक्रम आयोजना गर्ने भएको छ । वाक फल वेलफेयर मार्फत एक लाख डलर सहयोग संकलन गर्ने लक्ष्य लिइएको छ ।

यसरी संकलित रकम अष्ट्रेलियामा परोपकारी कार्यमा खर्च हुनेछ, जसको ६० प्रतिशत नारी निकुञ्जले र ४० प्रतिशत एनआरएन अष्ट्रेलियाकै अर्को परियोजना ‘वेलफेयर फन्ड’मा जम्मा गरिने भएको छ ।

यहाँ आयोजित पत्रकार सम्मेलनमा वाकाथन कार्यक्रमकी संयोजक एवं नारी निकुञ्ज अष्ट्रेलियाकी संयोजक प्रतिज्ञा अधिकारीले वाक फर वेलफेयर कार्यक्रमको विषयमा जानकारी दिएकी थिइन् । यस वर्षको वाक फर वेलफेयरको उद्देश्य अष्ट्रेलियामा रहेको नेपाली समाजमा महिलाविरुद्धको हिंसाका विषयमा जनचेतना फैलाउने र बढ्दै गएको मानसिक समस्या न्यूनिकरण गर्न भूमिका निर्वाह गर्ने रहेको छ । यस्ता समस्याबाट पीडित बनेकाहरुको साथी बन्ने, आवश्यक सहयोग गर्ने, मनोबल उच्च बनाउने उद्देश्य पनि कार्यक्रमको रहेको छ ।

यसैक्रममा सिड्नीमा गर्न लागिएको वाक फर वेलफेयर कार्यक्रम अन्तर्राष्ट्रिय नारी दिवसको अवसर पारेर मार्च १० तारिख शनिबारका दिन गरिने भएको छ । BAY Council मा पर्ने Cook Park बाट सुरु भएर ब्राईटन बिचमा गएर वाकाथन टुंगिनेछ । करिब तीन किलोमिटरको यो दूरीमा सञ्चालन गरिने वाकाथनमा सहभागी हुनका लागि www.nrn.org.au मा आफ्नो नामा दर्ता गरेको हुनुपर्नेछ भने यस्तो दर्ता सहभागिता शुल्क वापत प्रति परिवार १ सय ५० अष्ट्रेलियन डलर र प्रतिव्यक्ति ६० अष्ट्रेलियन डलर लाग्नेछ । अष्ट्रेलियामा भिजिट भिसामा आउनुभएका नेपालीहरुको लागि भने यो शुल्क ३० मात्र हुनेछ ।

सिड्नीमा मात्र होइन वाक फर वेलफेयर , वेलफेयर फर ओमन कार्यक्रम भिक्टोरिया, क्वीन्सल्याण्ड, वेष्टर्न अष्ट्रेलिया, अष्ट्रेलियन क्यापिटल टेरेटरी क्यानबेरा, साउथ अष्ट्रेलिया मा पनि गरिनेछ । पत्रकार सम्मेलनमा उठेका विभिन्न जिज्ञासाको जवाफ संयोजक प्रतिज्ञा अधिकारी र एनआरएन अष्ट्रेलियाका अध्यक्ष टोनु घोतानेले दिएका थिए ।

उक्त अवसरमै एनआरएन अष्ट्रेलियाले हालसम्म गरेका विविध गतिविधि, टास्कफोर्सहरुको निर्माण र आगामी दिनमा सञ्चालन गर्ने परियोजनाहरुको बारेमा समेत अध्यक्ष घोताने र सचिव देव गुरुङले जानकारी दिएका थिए ।