हिमालपारीको जिल्ला मनाङका महिलाहरु बच्चा जन्माउनका लागि हेलिकप्टर नै चार्टर गरेर ठूला अस्पतालहरुमा धाउनुपर्ने बाध्यता कुनै नयाँ विषय होइन । उनिहरु विगत लामो समय अघिदेखि नै यो समस्याबाट ग्रसित छन् । सरकारले जिल्लामा रहेको एकमात्रै जिल्ला अस्पतालमा सुत्केरी गराउन नसक्ने महिलाहरुको लागि शल्यक्रियाको ब्यवस्था नगरिदिदाँ उनिहरुले यस्तो सास्ती खेप्नुपरेको हो ।
हिमाली जिल्ला मनाङमा रहेको एकमात्र जिल्ला अस्पतालमा सुत्केरी हुन नसकेका महिलाहरुको लागि शल्यक्रियाको ब्यवस्था हुन नसकेको् स्थानियहरु बताउँछन् । अस्पताल ब्यवस्थापन समितिले पहल नगरेका कारण यहाँका महिलाहरुले सास्ती खेप्नु परेको हो । चारवटा गाउँपालिका रहेको मनाङ भौगोलिक रुपमा अति विकट भएपनि सरकारले जिल्लाका नागरिकहरुलाई भने उचित स्वास्थ्य सेवा प्रवाह गर्न नसकेको महिलाहरु बताउँछन् । सामान्य बाहेक आकस्मिक रुपमा प्रसुतीका लागि अस्पतालमा आउने महिलाहरुले शल्यक्रियाको अभावमा ज्यानै गुमाउनुपर्ने बाध्यता मनाङमा रहेको छ ।
मनाङ एकातिर भौगोलिक विकटता र अर्कोतिर जिल्ला अस्पतालमा शल्यक्रियाको ब्यवस्था नहुँदा यहाँका महिलाहरु बर्षो अघिदेखि पिडा बोकेर बस्न बाध्य भएको स्थानिय समाजसेवी साङ्दो लामा बताउँछन् ।
जिल्लाका केही सम्पन्न महिलाहरु हेलिकप्टर चार्टर गरेर काठमाडौं, पोखरा, चितवन लगायतका शहरहरुमा जाने गरेपनि गरीब जनताहरुले भने शल्यक्रियाको अभावमा ज्यान नै गुुमाउनु पर्ने उदाहरण रहेको स्थानिय एक महिलाले बताइन् । उनले भनिन्, ‘गरिब जनताले हेलिकप्टर चार्टर गर्न सक्दैनन् । गर्भवती भएँ भन्ने थाहा पाएपछि हेलिकप्टर चार्टर खर्च जुटाउनुप¥यो की त शहर नै झनुप¥यो ।’
बेसीशहर–चामे सडक खण्डमा मोटर चलेपनि कच्ची सडकका कारण भनेको समयमा पुग्न नसकिने र ८ घण्टाको कच्ची सडकमा सुत्केरी लैजाँदा ज्यानै पनि जान सक्ने स्थानिय महिलाहरुको गुनासो छ । जिल्ला अस्पतालमा १५ बेडको अनुमती भएपनि अहिले अस्पतालले ७ वटा बेड मात्रै संचालनमा ल्याएको छ । अस्पतालमा बिरामीहरुको चाप हुने गरेपनि सरकार, अस्पताल प्रशासन र ब्यवस्थापन समितिले खासै चासो नराख्दा मनाङका जनताले सास्ती खेप्नुपरेको छ ।
प्रतिक्रिया