प्रहरी भन्नेवित्तिकै सामान्यतया आममानिसको दिमागमा निश्चित अनुशासनको दायरामा रही उपल्लो तहबाट अह्राइएको काम गर्ने, समाजका विकार–विकृति एवम् अपराध वा अपराधीको खोजीनीति गर्ने सुरक्षा निकायका सदस्य भन्ने भाव पैदा हुन्छ । प्रहरीको हातमा डण्डा, लाठी या हतियार हुने हुनाले उसबाट कविता, गीत जस्ता साहित्य सिर्जनाका काम हुँदा पृथक अनुभूति गर्नेको कमी यहाँ छैन । तथापि, नेपाली साहित्यफाँटमा ख्याति कमाएका प्रहरी अधिकृतहरू हामीकहाँ नभएका होइनन् ।

यस्तै प्रतिभाशाली सर्जकको परिचय स्थापित गर्ने क्रममा छन् प्रहरी निरीक्षक भोजराज पाण्डे । नेपाल प्रहरीको महानगरीय प्रहरी वृत्त सिंहदरबारमा कार्यरत प्रनि पाण्डे कर्मक्षेत्र प्रहरी सेवा भएर पनि गीत, कविता लेखनमा अत्यन्त रुचि राख्छन् । सानै उमेरदेखि साहित्य सिर्जनामा रुचि राख्दै आएका पाण्डे
गुल्मीको रेसुंगा नगरपालिकामा जन्मिएका हुन् ।

गीतलेखनमा विशेष रुचि राख्ने भोजराजद्वारा रचित ‘बिते कति रात…’ बोलको गीत यतिबेला चर्चामा छ । नवीन श्रेष्ठको संगीत संयोजनमा गायिका मेलिना राईले गाएको यस गीतमा सर्जक पाण्डेले सरल शब्दलाई पनि वजनदार भावमा प्रस्तुत गर्ने प्रयत्न जो गरेका छन्, यसमा उनलाई निकै हदसम्म सफलता मिलेको छ नभनीरहन सकिन्न । पेशागत रुपले आफ्नो ड्युटीप्रति कर्तव्यपरायण प्रहरी अधिकृतका रुपमा चिनिएका यी सर्जकलाई साहित्य फाँटमा पनि सफलता मिल्ने सम्भावना रहेको उनको प्रस्तुत गीतका आधारमा अनुमान लगाउन गाह्रो पर्दैन ।