प्रतिनिधि एवम् प्रदेशसभा निर्वाचन बिथोल्ने उद्देश्यले काठमाडौं उपत्यकाका विभिन्न महत्वपूर्ण स्थानमा उम्मेदवारलक्षित विष्फोटन गराउने कार्यमा संलग्न रहेका विप्लव नेतृत्वको नेपाल कम्युनिष्ट पार्टीका कार्यकर्ताहरू पक्राउ परेका छन् ।

विष्फोटक पदार्थ, विभिन्न हातहतियार र विभिन्न दस्तावेजसहित प्रहरी नियन्त्रणमा परेका नेकपा कार्यकर्ताहरूमा २४ वर्षका रवि गोले, ३४ वर्षका सम्पूर्ण मूक्ति भनिने विचारमान तामाङ, ३० वर्षका रोह नेपाली भन्ने महेश नेपाली, ४८ वर्षका विगेश लामा र ३२ वर्षका राजिव तामाङ रहेको प्रहरीले जनाएको छ ।

प्रहरीले दाबी गरेअनुसार सर्लाही स्थायी ठेगाना भई हाल लाजिम्पाट बस्दै आएका रवि विप्लव विप्लव नेतृत्वको नेकपाका काठमाडौं जिल्ला सदस्यको जिम्मेवारीमा रहनुका साथै युवा दस्ताका काठमाडौं संयोजक र काठमाडौं १ नम्बर कमाण्डको युवा दस्ता कमाण्डरसमेत हुन् । उनमाथि हातहतियार तथा विष्फोटक पदार्थ संकलन, भण्डारण गर्ने र विभिन्न स्थानमा विष्फोटन गराएको अनि गराउने योजना बनाइरहेको अभियोग लगाइएको छ ।

यस्तै, सिन्धुलीका विचारमान पनि नेकपाका काठमाडौं जिल्ला सदस्य हुन् भने उनमाथि पनि रविमाथि लागेकै अभियोग लगाइएको छ । मकवानपुरका महेश नेपालीचाहिँ अखिल नेपाल जनसांस्कृतिक महासंघका कोषाध्यक्ष हुन् । सामना परिवारका कलाकार उनी ललितपुरका एरिया सदस्य हुन् । उनी पनि विष्फोट गराउने कार्यमा संलग्न रहेको प्रहरीले बताएको छ ।

यसैगरी काभ्रेका विशेष लामा नेकपाको काठमाडौं जिल्ला सदस्य तथा न्याय विभाग प्रमुख हुन् भने नुवाकोटका राजिव सोही जिल्लाका जिल्ला सदस्य हुन् । उनीहरू दुवैजना विष्फोटक पदार्थ बनाउने प्रशिक्षण प्राप्त गरी उपत्यकामा विष्फोटन गराउने कार्यमा संलग्न रहेका पात्र हुन् ।