बेलायतकी पूर्वफेसन मोडल क्लेरी स्टोनमेनले एउटा मरन्च्याँसे कुकुरको छाउरो खरिद गरेको बेला कल्पना गरेकी थिइनन् कि यसकै ज्यानको आकारका कारण आज विश्वव्यापी पहिचान हासिल हुनेछ । फ्रेडी नामले पुकार्ने गरिएको उक्त कुकुरको लम्बाइ पाँच वर्ष अवधिमा ७ फिट ६ इन्च पुगेको छ भने गिनिज बुकमा विश्वकै अग्लो कुकुरको रूपमा दर्ता भई यश फैलाएको छ । ग्रेट डेन प्रजातिको उक्त कुकुर पिनट बटरको साथ चिकन खान मन पराउँछ भने एकैपटकमा किलोका किलो बटर र थुप्रै कुखुरा हजम गर्दछ । उसको खुराककै लागि मात्र वर्षेनी करिब १६ लाख रुपैयाँ खर्च हुने क्लेरीको भनाइ छ । आश्चर्यको कुराचाहिँ के छ भने फ्रेडीसँग अलग हुनुपर्ला भन्ने भयका कारण पछिल्लो पाँच वर्षदेखि उनी कुनै पुरुषसँग रिलेसनसिपमा छैनन् । उनी किङ साइजको बेडमा फ्रेडीसँगै सुत्छिन् । तथापि, क्लेरी एक यस्तो पार्टनरको खोजीमा छिन् जसलाई उनी र फ्रेडीबीचको सम्बन्धमा आपत्ति नहोस् ।