नेपाल कराते महासंघको आयोजनामा राखेप च्याम्पियनसिपअन्तर्गत राष्ट्रिय कराते प्रतियोगिता २०७४ कार्तिक २३ देखि २५ गते सम्म काठमाण्डौमा आयोजना हुने भएको छ । २०१८ मा हुने १८ औं एशियाली खेलकुद, सन् २०१९ मा नेपालमा आयोजना हुने १३ औं दक्षिण एशियाली खेलकुद र २०२० मा आयोजना हुने ओलम्पिक गेमलाई मध्येनजर राख्दै स्तरियता र अन्तराष्ट्रिय प्रतियोगितामा उत्कृष्ट सफलता हासिल गर्ने उद्धेश्यले प्रतियोगिता आयोजना गर्न लागिएको प्रतियोगिता संयोजक, साग स्वर्ण पदकधारी एवं प्रशिक्षक दीपक श्रेष्ठले जानकारी गराएका छन । राष्ट्रिय टिम छनोटका रुपमा समेत रहेको यो प्रतियोगितामा पहिला स्थान हात पार्ने खेलाडी राष्ट्रिय टिमलाई छानिने छन् ।

त्रिपुरेश्वरस्थित राखेपको कभर्डहलमा हुने तीन दिने प्रतियोगितामा संघिय संरचना अनुरुप सात प्रदेश र तीन विभगिय टिमका महिला तर्फ १०० र पुरुष तर्फ ११० गरि कुल २१० खेलाडी सहभागिता जनाउने छन । त्यस्तै महिला तर्फ ४५, ५०, ५५, ६१, ६८ केजी मुनी र ६८ केजी माथि गरि ६ र पुरुष तर्फ ५०, ५५, ६०, ६७, ७५, ८४ केजी मुनी र ८४ केजी माथी गरि ७ तथा महिला/पुरुष एकल र टिम काता गरि कुल १७ स्वर्ण पदकका लागि प्रतिस्पर्धा गर्ने संघले जानकारी गराएको छ ।

प्रतियोगितामा सहभागि हुने सात प्रदेशका खेलाडीहरुलाई प्रदेशस्तरमा प्रतिस्पर्धा गराई छनोट गरिने र प्रत्येक टोलीले प्रतियोगितामा प्रत्येक विधामा एक एक खेलाडी र कातामा गरि २१ खेलाडीले सहभागिता जनाउन पाउने नेपाल कराते महासंघका अध्यक्ष दावा गुरुङ्गले जानकारी गराए । राष्ट्रिय खेलकुद परिषदका पूर्व कोषाध्यक्ष मिनकृष्ण महर्जनले यस प्रतियोगिताले आठौं सागमा हासिल गरेको उपलब्धिलाई पुन हासिल गर्ने विश्वास ब्यक्त गरे । प्रतियोगिताको अनुमानित बजेट करिब २९ लाखको रहेको छ ।