दूधे गोल्ड कप : हिमालयन शेर्पा अन्तिम चारमा

दूधे गोल्ड कप : हिमालयन शेर्पा अन्तिम चारमा


झापाको शिवसताक्षी नगरपालिकामा जारी दूधे गोल्ड कपमा घरेलु टोली रमपम झापा–११ लाई हराउँदै हिमालयन शेर्पा क्लबले अन्तिम चारमा स्थान पक्का गरेको छ । हिमालयन शेर्पा क्लबले झापा ११ लाई टाइब्रेकरमा ३–२ गोल अन्तरले पाखा लगाउँदै अन्तिम चारमा स्थान सुरक्षित गरेको हो ।

खेल अवधिभर १–१ गोलको बराबरी भएपछि खेल टाइब्रेकरमा धकेलिएको थियो । टाइब्रेकरमा झापाका खेलाडी योगेश गुरुङ, पुजन उपरकोटी र बुद्ध चेम्जोङको प्रहार बाहिरिएको थियो ।

हिमालय शेर्पाको लागि विजय श्रेष्ठ, दिवस उराउ र बिके लामाले गरेको प्रहार गोलमा परिणत भएको थियो ।

यसअघि झापाका लागि खेलको १५ औं मिनेटमा क्याप्टेन योगेश गुरुङले पहिलो गोल गरेका थिए । उनले डि–बक्स एरिया नजिकबाट गरेको प्रहार हिमालयन शेर्पाका गोल रक्षक भिमशेन दुराले अनुमानै लगाउन सकेनन् ।

हिमालयन शेर्पाका विजय श्रेष्ठले दोस्रो हाफको ७ औं मिनेटमा गोल गर्दै खेललाई १–१ को बराबरीमा पु¥याएका थिए । बिके लामाको पासलाई सदुपयोग गर्दै उनले वान–टच गोल लगाए ।

निकै प्रतिष्पर्धात्मक खेलमा दुवै टोलीले गोल गर्ने थुप्रै अवसरहरु गुमाएका थिए ।

खेलको ९ औं मिनेटमा हिमालयन शेर्पाका खेलाडी दिवस उराउले डि–बक्स एरिया नजिकबाट गरेको शसक्त प्रहारलाई झापाका गोल रक्षक किशोर गिरीले पञ्च गर्दै उत्कृष्ट बचाउ गरेका थिए ।

खेलको १४औं मिनेटमा झापाका योगेश गुरुङले डि–बक्स एरिया नजिकैबाट गरेको प्रहार बाहिरिँदा झापाले अग्रतालाई दोब्बर बनाउने मौका गुमाएको थियो ।
खेलको ३५ औं मिनेटमा हिमालयन शेर्पाका विके लामाले पेनाल्टी एरियाबाट गरेको प्रहार झापाका गोल रक्षकले बचाएका थिए । खेलमा निशान राई र कर्ण लिम्बूको तालमेल नमिल्दा झापाले गोल गर्ने थुप्रै अवसरहरु गुमाएको थियो ।

खेलमा हिमालयन शेर्पाका म्यान अफ द म्याच विजय श्रेष्ठले नगद ५ हजार पाए ।

शुक्रबार त्रिभुवन आर्मी क्लब र मोरङ–११ बीच प्रतिष्पर्धा हुने सञ्चार संयोजक विनोद सापकोटाले बताए ।

– रेजिना गौतम (झापा)