पशुपति शमशेर राणा समूहमा लागेका केन्द्रीय सदस्य तथा सांसदहरुलाई मूल प्रवाहमा फर्किन कमल थापा नेतृत्वको राप्रपाले अपिल गरेको छ । राप्रपाको आजदेखि हेटौडामा सुरु भएको केन्द्रीय समितिको विशेष बैठकले सो अपिल गरेको केन्द्रीय सदस्य दिलनाथ गिरीले जानकारी गराए ।
भदौ ४ गतेको लागि राणा समूहलाई निर्वाचन आयोगमा दल दर्ताको लागि सनाखत गराउन बोलाएको अवस्थामा संस्थापनले तीन गतेभित्र मूल प्रवाहमा आउन ढोका खुल्ला गरेको हो । गत २२ बजे राणाले आफ्नो पक्षमा ४० प्रतिशत केन्द्रीय सदस्य र सांसद रहेको दाबी गर्दै राप्रपा प्रजातान्त्रिक गठन गर्न निर्वाचन आयोगमा निवेदन दिएका थिए ।
आजको बैठकमा केन्द्रीय सदस्यहरु गिरी सहित तोरण गुरुङ, धनबहादुर बुढा, दिनेश शाह , श्यामबहादुर शाहीलगायतले धारणा राखेका थिए । उनीहरुले राणाले पार्टी फुटाउने प्रयास गरेर गम्भीर भुल गरेको, संशोधनको विपक्षमा मतदान गरिनुपर्ने, पार्टीले सशक्त रुपमा आफ्ना एजेण्डालाई जनतासामु लैजानुपर्नेलगायतका धारणा राखेका थिए । बैठक भदौ ३ गतेसम्म चल्ने बताइएको छ ।
गिरीका अनुसार बैठकले देशी विदेशी शक्तिको उक्साहटमा राणाले पार्टी विभाजनको प्रयास गरेको ठहर गर्दै पार्टीको मुल प्रवाहमा फर्किन अपिल गरेको हो । राप्रपाको बैठक अविरल वर्षापछि आएको बाढीपहिरो, आगामी चुनावमा पार्टीको रणनीति, संविधान संशोधन, पार्टी फुट र अब गर्नुपर्ने पहका साथै समसामयिक र विविध गरी ७ एजेण्डामा केन्द्रीत रहेको बताइएको छ । तस्बिर सौजन्यः राजाराम बर्तौला
प्रतिक्रिया