गत विहिबारदेखि बाँसबारीस्थित न्यूरो अस्पतालमा उपचारका लागि भर्ना गरिएका नेपाली कांग्रेसका नेता चक्रप्रसाद बाँस्तोलाको स्वास्थ्य अवस्था बुझ्न कांग्रेस सभापति एवम् प्रधानमन्त्री शेरबहादुर देउवा शनिबार साँझ बाँसबारीस्थित न्यूरो अस्पताल पुगेका छन् । छातीमा समस्या देखिएपछि परिवारजनले उपचारको लागि बाँस्तोलालाई बाँसबारीस्थित न्यूरो अस्पतालमा भर्ना गरेका थिए ।

अस्पतालमा बिरामी भेट्ने क्रममा प्रधानमन्त्रीले बाँस्तोलाको अवस्थाबारे परिवारका सदस्यसँग जानकारी लिनुका साथै उनको उपचारमा सरकारको तर्फबाट पूर्ण सहयोग रहने प्रतिबद्धता व्यक्त गरे । नेपाली कांग्रेसका वरिष्ठ नेता रामचन्द्र पौडेल र महामन्त्री डा. शशाङ्क कोइरालालगायत नेताहरुले पनि शनिबार नै न्युरो अस्पताल पुगी स्वास्थ्य अवस्था बुझेका थिए ।

उपचारमा संलग्न चिकित्सक न्यूरो सर्जन डा. प्रत्यूष श्रेष्ठले बाँस्तोलालाई अस्पताल आएको दुई दिनपछि स्वास्थ्यमा गम्भीर समस्या देखिएकाले सघन कक्षमा भेन्टिलेटरमा राखी उपचार गरिएको जानकारी दिएका छन् । शनिबार उनको छातीको एक्सरे, रगतमा अक्सिजन, कार्वनडाइक्साइडको मात्रा राम्रो देखिएको भन्दै अझै केही दिन उनलाई सघन कक्षमा नै राखी निगरानी गर्नुपर्ने अस्पतालले जनाएको छ ।

स्मरण रहोस्, २०६९ साल पुस १४ गते विराटनगरमा भएको एक कार्यक्रममा सहभागी भइरहँदा मस्तिष्काघात भएपछि नेता बाँस्तोला अहिलेसम्म अचेत अवस्थामा छन् । उनलाई सबै खाना पाइपबाटै खुवाउनुपर्छ । सबै खालका खाना तरल बनाएर मात्र खुवाउने गरिएको छ । अहिलेकै अवस्थामा सुधार आइरहेमा सघन कक्षबाट वार्डमा राखी उपचार गर्न सकिने भएपनि प्रत्येक दिन चुनौतीपूर्ण भएकाले अहिले नै केही भन्न हतार हुने बाँस्तोलाको उपचारमा संलग्न चिकित्सकहरुले जनाएका छन् ।