बन्दाबन्दी जेठ महिनाभर, सीमा क्षेत्रमा प्रहरीको गस्ती बढाउने तयारी गरिँदै

बन्दाबन्दी जेठ महिनाभर, सीमा क्षेत्रमा प्रहरीको गस्ती बढाउने तयारी गरिँदै


सरकारले जारी बन्दाबन्दी (लकडाउन) लाई जेठ महिनाभर लम्ब्याउने निर्णय गरेको छ । यसअघिको निर्णयअनुसार बन्दाबन्दीको अवधि जेठ २० गते समाप्त हुनु तीन दिअघि नै सरकारले शनिबार (१७ जेठ) कोरोना भाइरस रोकथाम तथा नियन्त्रण उच्चस्तरीय समितिको सिफारिसमा ‘लकडाउन’ ३२ गतेसम्म लम्बाउने निर्णय गरेको हो ।

प्रधानमन्त्री निवास बालुवाटारमा शनिबार साँझ बसेको मन्त्रिपरिषद्को बैठकले जेठ मसान्तसम्म बन्दाबन्दी लम्ब्याउने एवम् अन्तरराष्ट्रिय सीमा–नाका र विमानस्थल आगामी असार १६ गतेसम्म बन्द गर्ने निर्णय गरेको हो ।

सरकारका प्रवक्ता सूचना तथा सञ्चार प्रविधिमन्त्री डा. युवराज खतिवडाका अनुसार सीमा क्षेत्रमा आवागमन स्थगन गर्दै गर्दा त्यहाँबाट आउने–जाने कुरालाई अलि कडाइ गरिने र सीमा वारिपारि गर्ने विषयमा विश्व स्वास्थ्य संगठनको मापदण्डानुसार जाँच गरेर मात्रै लाने वा लैजाने कुरा पालना गर्न–गराउनका लागि छिमेकी मुलुकसँग सहकार्य गर्ने निर्णय पनि भएको छ ।

बन्दाबन्दी अवधिमा यसको ढाँचाबारे कोरोना भाइरस रोकथाम तथा नियन्त्रण उच्चस्तरीय समितिको सिफारिसका आधारमा मन्त्रिपरिषद्ले निर्णय गर्ने बताइएको छ ।

प्रवक्ता खतिवडाका अनुसार सुरक्षा परिषद्को बैठकमा अन्तरराष्ट्रिय सीमा विवाद तथा कोभिड–१९ सँग सम्बन्धित अन्तरराष्ट्रिय जोखिम र चुनौती सम्बोधन गर्न सुरक्षा निकायलाई कसरी परिचालन गर्न सकिन्छ भन्नेबारे छलफल भएको छ । मन्त्री खतिवडाले भने– ‘खासगरी अहिले सीमा क्षेत्रहरुमा सीमा वारपारका गतिविधि र मान्छेको आवागमनलाई कडाइका साथ पालना गराउन सशस्त्र प्रहरीको गस्ती बढाउने एवं जनशक्ति थप्ने र त्यसका लागि सशस्त्र प्रहरी र नेपाल प्रहरीलाई बढी परिचालन गर्ने विषयमा पनि छलफल भएको छ ।’