विकास रौनियार, धादिङ

कोरोना भाइरस कोभिड–१९ रोकथाम तथा नियन्त्रणको लागि राजमार्गबाट त्रिशूली नदी तर्न धादिङ प्रहरीले थप कडाई गरेको छ ।

सरकारद्वारा लकडाउन गरिएको दुई महिना पुग्दा धादिङका प्रमुख जिल्ला अधिकारी अस्मान तामाङको अग्रसरतामा सदरमुकाम धादिङबेंसीलगायत त्रिशूली नदीवारिका विभिन्न स्थानीय तहमा प्रवेश गर्न कडाई गरिएको हो ।

कोरोना नियन्त्रण तथा व्यवस्थापन समिति बैठकले धादिङबेसी लगायतमा विशेष सावधानी अपनाउने र त्रिशूली नदी तरेर आउने सवारी साधनहरुलाई विशेष निगरानी गर्नको लागि सिद्धलेक गाउँपालिकाको फुर्केखोलास्थित पुलमा अस्थायी प्रहरी पोष्ट खडा गरेर चेकजाँचमा कडाई गरिएको छ ।

सिद्धलेक गाउँपालिकाले सवारी चेकजाँचका गर्नको लागि अस्थायी प्रहरी पोष्ट निर्माण गरेको छ । ‘जिल्ला प्रवेश गर्ने मुख्य नाकाहरुमा अस्थायी पोष्ट खडा गरी प्रहरी बसिसकेको छ, प्रहरीलाई स्थानीय स्वयंसेवी युवाहरुले सहयोग गर्ने छन्’, जिल्ला प्रहरी प्रमुख रवीन्द्र रेग्मीले बताउनुभयो ।